mujhe tha tujhse kabhi pyar jhuT bola tha

mujhe thā tujh se kabhī pyaar jhuuT bolā thā

hai jhuuT ye bhī ki dil-dār jhuuT bolā thā

ye jhuuT bolā ki rātoñ meñ jāgtā huuñ maiñ

tumhārī yaad meñ ai yaar jhuuT bolā thā

na-jāne kaise ḳhalāoñ meñ kho gayā yaaro

yaqīn maano chamakdār jhuuT bolā thā

safed sach ko bhī parkhā zamāne vāloñ ne

safed jhuuT ki har baar jhuuT bolā thā

isī liye to chamak thī hamāre dhande meñ

huzūr ham ne lagātār jhuuT bolā thā

phir is ke baa'd mohabbat talāsh kartā rahā

anā meñ ho ke giraftār jhuuT bolā thā

thī gol-mol hamārī bhī guftugū lekin

'ajīb us ne bhī ḳhamdār jhuuT bolā thā

ḳhushī ke naam pe dukh ham ne bech Daale the

ḳhafā thā ham se ḳharīdār jhuuT bolā thā

use ḳhabar thī ta'alluq bhī TuuT saktā hai

tabhī to us ne samajh-dār jhuuT bolā thā

maiñ jāntā thā haqīqat isī liye maiñ ne

tumhārā ban ke taraf-dār jhuuT bolā thā

ab itnī baat pe kyoñ hashr tum uThāte ho

ki tum se kah to diyā yaar jhuuT bolā thā

thī us kī bazm meñ phir bhī kyoñ kaḌkaḌāhaT sī

agarche ham ne mazedār jhuuT bolā thā

hamāre sar pe hai ilzām be-vafā.ī kā

magar thā tū bhī sazā-vār jhuuT bolā thā

zarā sī baat pe dīvār toḌne chale ho

koī nahīñ pas-e-dīvār jhuuT bolā thā

har ek baat tumhārī thī mo'tabar jaanī

alag ye baat ki har baar jhuuT bolā thā

phir is ke baa'd to 'ādat sī ban ga.ī 'ārif'

zarā sā bas yūñhī ik baar jhuuT bolā thā

mujhe tha tujh se kabhi pyar jhuT bola tha

hai jhuT ye bhi ki dil-dar jhuT bola tha

ye jhuT bola ki raaton mein jagta hun main

tumhaari yaad mein ai yar jhuT bola tha

na-jaane kaise KHalaon mein kho gaya yaro

yaqin mano chamakdar jhuT bola tha

safed sach ko bhi parkha zamane walon ne

safed jhuT ki har bar jhuT bola tha

isi liye to chamak thi hamare dhande mein

huzur hum ne lagatar jhuT bola tha

phir is ke ba'd mohabbat talash karta raha

ana mein ho ke giraftar jhuT bola tha

thi gol-mol hamari bhi guftugu lekin

'ajib us ne bhi KHamdar jhuT bola tha

KHushi ke nam pe dukh hum ne bech Dale the

KHafa tha hum se KHaridar jhuT bola tha

use KHabar thi ta'alluq bhi TuT sakta hai

tabhi to us ne samajh-dar jhuT bola tha

main jaanta tha haqiqat isi liye main ne

tumhaara ban ke taraf-dar jhuT bola tha

ab itni baat pe kyon hashr tum uThate ho

ki tum se kah to diya yar jhuT bola tha

thi us ki bazm mein phir bhi kyon kaDkaDahaT si

agarche hum ne mazedar jhuT bola tha

hamare sar pe hai ilzam be-wafai ka

magar tha tu bhi saza-war jhuT bola tha

zara si baat pe diwar toDne chale ho

koi nahin pas-e-diwar jhuT bola tha

har ek baat tumhaari thi mo'tabar jaani

alag ye baat ki har bar jhuT bola tha

phir is ke ba'd to 'adat si ban gai 'arif'

zara sa bas yunhi ek bar jhuT bola tha