mujhe to ye bhi fareb-e-hawas lagta hai

mujhe to ye bhī fareb-e-havās lagtā hai

vagarna kaun añdheroñ meñ saath chaltā hai

bikhar chukī jaras-e-kārvān-e-gul kī sadā

ab us ke baa'd to vāmāñdgī kā vaqfa hai

jo dekhiye to sabhī kārvāñ meñ shāmil haiñ

jo sochiye to safar meñ har ek tanhā hai

kise ḳhabar ki ye duurī kā bhed kyā shai hai

qadam uThāo to rasta bhī saath chaltā hai

ubhar rahe haiñ jo manzar fareb-e-manzar haiñ

jo khul rahā hai darīcha to vahm apnā hai

talab to kar kise mā'lūm kāmgār bhī ho

zamāna aib-o-hunar ab kahāñ parakhtā hai

tirī sadā hai ki zulmat meñ raushnī kī lakīr

tirā badan hai ki naġhmoñ kā dil dhaḌaktā hai

udāsiyoñ ko na chhūne de phuul sā paikar

abhī kuchh aur tujhe ahl-e-ġham pe hañsnā hai

mirī vafā pe bhī ai dost e'tibār na kar

mujhe bhī terī tarah sab se pyaar karnā hai

ye pūchhnā hai ki ġhairoñ se kyā milā tujh ko

tirī jafā kī shikāyat to kaun kartā hai

chaman chaman hai agar gul-fishāñ to kyā kiije

hameñ to apne ḳharābe ko hī palaTnā hai

ye ek chaap jo barsoñ meñ sun rahā huuñ maiñ

koī to hai jo yahāñ aa ke luuT jaatā hai

mujhe to ye bhi fareb-e-hawas lagta hai

wagarna kaun andheron mein sath chalta hai

bikhar chuki jaras-e-karwan-e-gul ki sada

ab us ke ba'd to wamandgi ka waqfa hai

jo dekhiye to sabhi karwan mein shamil hain

jo sochiye to safar mein har ek tanha hai

kise KHabar ki ye duri ka bhed kya shai hai

qadam uThao to rasta bhi sath chalta hai

ubhar rahe hain jo manzar fareb-e-manzar hain

jo khul raha hai daricha to wahm apna hai

talab to kar kise ma'lum kaamgar bhi ho

zamana aib-o-hunar ab kahan parakhta hai

teri sada hai ki zulmat mein raushni ki lakir

tera badan hai ki naghmon ka dil dhaDakta hai

udasiyon ko na chhune de phul sa paikar

abhi kuchh aur tujhe ahl-e-gham pe hansna hai

meri wafa pe bhi ai dost e'tibar na kar

mujhe bhi teri tarah sab se pyar karna hai

ye puchhna hai ki ghairon se kya mila tujh ko

teri jafa ki shikayat to kaun karta hai

chaman chaman hai agar gul-fishan to kya kije

hamein to apne KHarabe ko hi palaTna hai

ye ek chap jo barson mein sun raha hun main

koi to hai jo yahan aa ke luT jata hai