mujhe wo kaifiyat apni batane kyun nahin aaya

mujhe vo kaifiyat apnī batāne kyuuñ nahīñ aayā

tujhe ma.alūm to hogā zamāne kyuuñ nahīñ aayā

vo sūraj hai to phir us ke na aane kā sabab kyā hai

mire saa.e se milne ke bahāne kyuuñ nahīñ aayā

maiñ us ko khīñchtī hī rah ga.ī lekin na aayā vo

vo merā saañs thā aur saañs jaane kyuuñ nahīñ aayā

mirī ḳhālī kalā.ī kah rahī hai iid kī shab ko

vo ab tak chūḌiyāñ le kar na jaane kyuuñ nahīñ aayā

bahut da.avā thā us ko dil kī baazī jiit jaane kā

to phir is khel meñ mujh ko harāne kyuuñ nahīñ aayā

darīcha khol ke kab se sarāpā gosh baiThī huuñ

koī mausam tirī bāteñ sunāne kyoñ nahīñ aayā

vo kahtā thā ki us kī guftugū hai aa.ine jaisī

to phir chehra mirā mujh ko dikhāne kyuuñ nahīñ aayā

mujhe wo kaifiyat apni batane kyun nahin aaya

tujhe malum to hoga zamane kyun nahin aaya

wo suraj hai to phir us ke na aane ka sabab kya hai

mere sae se milne ke bahane kyun nahin aaya

main us ko khinchti hi rah gai lekin na aaya wo

wo mera sans tha aur sans jaane kyun nahin aaya

meri KHali kalai kah rahi hai id ki shab ko

wo ab tak chuDiyan le kar na jaane kyun nahin aaya

bahut dawa tha us ko dil ki bazi jit jaane ka

to phir is khel mein mujh ko harane kyun nahin aaya

daricha khol ke kab se sarapa gosh baiThi hun

koi mausam teri baaten sunane kyon nahin aaya

wo kahta tha ki us ki guftugu hai aaine jaisi

to phir chehra mera mujh ko dikhane kyun nahin aaya