mujhe yaad hain wo din jo teri bazm mein guzare

mujhe yaad haiñ vo din jo tirī bazm meñ guzāre

vo jhukī jhukī nigāheñ vo dabe dabe ishāre

ye tirā sukūt-e-rangīñ ye adā-e-be-niyāzī

kahīñ bujh ke rah na jaa.eñ mirī ruuh ke sharāre

kabhī shauq-e-zindagī thā kabhī lutf-e-sarḳhushī thā

magar ab to jī rahā huuñ tirī yaad ke sahāre

ye chaman chaman bahāreñ ye ravāñ-davāñ havā.eñ

inheñ kyā samajh sakeñge ġham-e-zindagī ke maare

mujhe kyā sukūn miltā mire ashk kaise thamte

ki machal rahe haiñ dil meñ tire ġham ke tez dhāre

kahīñ hai vajūd-e-sāhil mujhe kaise bāvar aa.e

mirī kashti-e-tamannā na lagī kabhī kināre

shab-e-intizār guzrī mirī zindagī na badlī

vahī 'hosh' mere aañsū vahī Dūbte sitāre

mujhe yaad hain wo din jo teri bazm mein guzare

wo jhuki jhuki nigahen wo dabe dabe ishaare

ye tera sukut-e-rangin ye ada-e-be-niyazi

kahin bujh ke rah na jaen meri ruh ke sharare

kabhi shauq-e-zindagi tha kabhi lutf-e-sarKHushi tha

magar ab to ji raha hun teri yaad ke sahaare

ye chaman chaman bahaaren ye rawan-dawan hawaen

inhen kya samajh sakenge gham-e-zindagi ke mare

mujhe kya sukun milta mere ashk kaise thamte

ki machal rahe hain dil mein tere gham ke tez dhaare

kahin hai wajud-e-sahil mujhe kaise bawar aae

meri kashti-e-tamanna na lagi kabhi kinare

shab-e-intizar guzri meri zindagi na badli

wahi 'hosh' mere aansu wahi Dubte sitare