mujhe zindagi se najat de meri zindagi se bani nahin

mujhe zindagī se najāt de mirī zindagī se banī nahīñ

vahī tīrgī mujhe phir se de mirī raushnī se banī nahīñ

mirī baat sun mire kūza-gar tire chaak par hai jo zindagī

use phir banā use toḌ de ki ye ‘umdagī se banī nahīñ

mujhe 'ishq thā tirī zaat se tujhe kaam thā mire naam se

kabhī lā-zavāl kī dahr meñ kisī 'ārzī se banī nahīñ

ye daraḳht phuul ye vādiyāñ ye pahāḌ khet ye laḌkiyāñ

mirī ḳhush-dilī kā javāz haiñ mirī be-dilī se banī nahīñ

mujhe āb-o-ḳhāk se māvarā kisī apsarā kī talāsh thī

kisī māh-rū kisī gul-badan kisī jal-parī se banī nahīñ

maiñ bahut 'ajīb-o-ġharīb huuñ mujhe aap apnī nahīñ ḳhabar

kabhī 'āshiqī kā junūn hai kabhī 'āshiqī se banī nahīñ

mujhe zindagi se najat de meri zindagi se bani nahin

wahi tirgi mujhe phir se de meri raushni se bani nahin

meri baat sun mere kuza-gar tere chaak par hai jo zindagi

use phir bana use toD de ki ye ‘umdagi se bani nahin

mujhe 'ishq tha teri zat se tujhe kaam tha mere nam se

kabhi la-zawal ki dahr mein kisi 'arzi se bani nahin

ye daraKHt phul ye wadiyan ye pahaD khet ye laDkiyan

meri KHush-dili ka jawaz hain meri be-dili se bani nahin

mujhe aab-o-KHak se mawara kisi apsara ki talash thi

kisi mah-ru kisi gul-badan kisi jal-pari se bani nahin

main bahut 'ajib-o-gharib hun mujhe aap apni nahin KHabar

kabhi 'ashiqi ka junun hai kabhi 'ashiqi se bani nahin