mujhi se puchh rahe hain wo mera haal-e-zabun

mujhī se pūchh rahe haiñ vo merā hāl-e-zabūñ

to kyā maiñ apnī tabāhī pe raushnī Dālūñ

zabān-e-hāl se de kar mujhe payām-e-sukūñ

tire ḳhayāl ne kuchh aur kar diyā mahzūñ

sunā ki vaj.h-e-tulūa-e-sahar haiñ ahl-e-junūñ

to ḳhud hī TuuT gayā tīrgī-e-shab kā fusūñ

tire sukūt kā mafhūm kaun samjhegā

tire sukūt pe maiñ bhī agar ḳhamosh rahūñ

junūn-e-shauq kī azmat pe tanz farmā kar

baḌhā ga.e haiñ vo kuchh aur bhī vaqār-e-junūñ

ġham-e-hayāt se pāmāl ho ke bhī ham ne

ġham-e-hayāt ko hone diyā na ḳhvār-o-zabūñ

jo tum ko fikr-e-nizām-e-chaman nahīñ yaaro

to laao maiñ hī bahāroñ kā ehtimām karūñ

hai jab se gardish-e-hālāt par nigāh mirī

maiñ ḳhud bhī gardish-e-hālāt kī nigāh meñ huuñ

'atīq' shā.ir-e-imroz hī kaho na mujhe

ki maiñ to shā.ir-e-mustaqbil-e-hayāt bhī huuñ

mujhi se puchh rahe hain wo mera haal-e-zabun

to kya main apni tabahi pe raushni Dalun

zaban-e-haal se de kar mujhe payam-e-sukun

tere KHayal ne kuchh aur kar diya mahzun

suna ki wajh-e-tulua-e-sahar hain ahl-e-junun

to KHud hi TuT gaya tirgi-e-shab ka fusun

tere sukut ka mafhum kaun samjhega

tere sukut pe main bhi agar KHamosh rahun

junun-e-shauq ki azmat pe tanz farma kar

baDha gae hain wo kuchh aur bhi waqar-e-junun

gham-e-hayat se pamal ho ke bhi hum ne

gham-e-hayat ko hone diya na KHwar-o-zabun

jo tum ko fikr-e-nizam-e-chaman nahin yaro

to lao main hi bahaaron ka ehtimam karun

hai jab se gardish-e-haalat par nigah meri

main KHud bhi gardish-e-haalat ki nigah mein hun

'atiq' shair-e-imroz hi kaho na mujhe

ki main to shair-e-mustaqbil-e-hayat bhi hun