mukammal ho gae wahshat ke saman hum na kahte the

mukammal ho ga.e vahshat ke sāmāñ ham na kahte the

pukāreñge hameñ dasht-o-bayābāñ ham na kahte the

na ghabrā ai dil-e-bargashta-sāmāñ ham na kahte the

jafā par husn ḳhud hogā pashemāñ ham na kahte the

'shifā' vahshat banegī mīr-e-sāmāñ ham na kahte the

mohabbat karke pachhtā.egā nādāñ ham na kahte the

zarā aane to do tuġhyāniyāñ bahr-e-mohabbat meñ

phir istiqbāl ko ā.eñge tūfāñ ham na kahte the

chaman meñ ġham se baḌh kar kaun thā tum kyoñ chale aa.e

hazāroñ phuul hoñge chāk-dāmāñ ham na kahte the

tumhārī shoḳh nazreñ kis liye uTThī thiiñ mastoñ par

baneñge dhajjiyāñ jaib-o-garebāñ ham na kahte the

masīhā ban to baiThe ho masīhā.ī nahīñ aatī

na hogā tum se dard-e-dil kā darmāñ ham na kahte the

bahut mahñgī paḌegī bulbul-e-nāshād āzādī

qafas ban jā.egā sehn-e-gulistāñ ham na kahte the

mohabbat meñ dil-o-jāñ se 'shifā' kab kaam chaltā hai

fidā karne paḌeñge dīn-o-īmāñ ham na kahte the

mukammal ho gae wahshat ke saman hum na kahte the

pukarenge hamein dasht-o-bayaban hum na kahte the

na ghabra ai dil-e-bargashta-saman hum na kahte the

jafa par husn KHud hoga pasheman hum na kahte the

'shifa' wahshat banegi mir-e-saman hum na kahte the

mohabbat karke pachhtaega nadan hum na kahte the

zara aane to do tughyaniyan bahr-e-mohabbat mein

phir istiqbaal ko aaenge tufan hum na kahte the

chaman mein gham se baDh kar kaun tha tum kyon chale aae

hazaron phul honge chaak-daman hum na kahte the

tumhaari shoKH nazren kis liye uTThi thin maston par

banenge dhajjiyan jaib-o-gareban hum na kahte the

masiha ban to baiThe ho masihai nahin aati

na hoga tum se dard-e-dil ka darman hum na kahte the

bahut mahngi paDegi bulbul-e-nashad aazadi

qafas ban jaega sehn-e-gulistan hum na kahte the

mohabbat mein dil-o-jaan se 'shifa' kab kaam chalta hai

fida karne paDenge din-o-iman hum na kahte the