muKHtalif rang ke phulon se chaman banta hai

muḳhtalif rang ke phūloñ se chaman bantā hai

dar-o-dīvār mahakte haiñ vatan bantā hai

lafz bikhreñge to mafhūm bhī kho jā.egā

harf se harf jo milte haiñ suḳhan bantā hai

aag se miTTī havā paanī gale milte haiñ

phir kahīñ jā ke koī sho'la-badan bantā hai

ham jo rukte haiñ to ruk jaatī hai nabz-e-kaunain

ham jo chalte haiñ to duniyā kā chalan bantā hai

ik na ik roz zamīñ oḌh ke so jaate haiñ

ham ġharīboñ kā isī tarh kafan bantā hai

ghar jo girte haiñ to hotī hai mahal kī tā'mīr

TuuT jaatā hai jo dil rāj-bhavan bantā hai

āñkheñ achchhī hoñ to baḌh jaatā hai me’yār-e-nazar

fikr ke saath salīqa ho to fan bantā hai

naale bekār nahīñ jaate mohabbat meñ 'ra.īs'

dard baḌhtā hai to majbūr kā dhan bantā hai

muKHtalif rang ke phulon se chaman banta hai

dar-o-diwar mahakte hain watan banta hai

lafz bikhrenge to mafhum bhi kho jaega

harf se harf jo milte hain suKHan banta hai

aag se miTTi hawa pani gale milte hain

phir kahin ja ke koi sho'la-badan banta hai

hum jo rukte hain to ruk jati hai nabz-e-kaunain

hum jo chalte hain to duniya ka chalan banta hai

ek na ek roz zamin oDh ke so jate hain

hum gharibon ka isi tarh kafan banta hai

ghar jo girte hain to hoti hai mahal ki ta'mir

TuT jata hai jo dil raj-bhawan banta hai

aankhen achchhi hon to baDh jata hai me’yar-e-nazar

fikr ke sath saliqa ho to fan banta hai

nale bekar nahin jate mohabbat mein 'rais'

dard baDhta hai to majbur ka dhan banta hai