muKHtalif tariqon se ranj umr bhar paya

muḳhtalif tarīqoñ se rañj umr bhar paayā

zindagī to kyā paa.ī ham ne dard-e-sar paayā

dost se tavaqqo thī kuchh karam-numā.ī kī

maiñ tavīl shikve ko muḳhtasar na kar paayā

vāqi.a sahī lekin jurm hai ye kahnā bhī

maiñ ne apne aalam se un ko be-ḳhabar paayā

bul-havas meñ aur mujh meñ farq kuchh batāo to

kis ko dūrbīñ paayā kis ko kam-nazar paayā

is jahān-e-rañgīñ se mutma.in nahīñ koī

maiñ ne ahl-e-duniyā ko āzim-e-safar paayā

dil meñ un kī aamad se nuur kī kiran phūTī

raat ke añdhere ne jalva-e-sahar paayā

kaash abhī hayāt apnī aur kuchh vafā kartī

maiñ tire taġhāful kā shukr adā na kar paayā

ham ne kyā taraqqī kī kasb-e-ilm-o-fan kar ke

bāvajūd-e-koshish bhī ḳhud ko be-hunar paayā

ab to hādse dil ke yaad bhī nahīñ 'nudrat'

kis maqām par khoyā kis maqām par paayā

muKHtalif tariqon se ranj umr bhar paya

zindagi to kya pai hum ne dard-e-sar paya

dost se tawaqqo thi kuchh karam-numai ki

main tawil shikwe ko muKHtasar na kar paya

waqia sahi lekin jurm hai ye kahna bhi

main ne apne aalam se un ko be-KHabar paya

bul-hawas mein aur mujh mein farq kuchh batao to

kis ko durbin paya kis ko kam-nazar paya

is jahan-e-rangin se mutmain nahin koi

main ne ahl-e-duniya ko aazim-e-safar paya

dil mein un ki aamad se nur ki kiran phuTi

raat ke andhere ne jalwa-e-sahar paya

kash abhi hayat apni aur kuchh wafa karti

main tere taghaful ka shukr ada na kar paya

hum ne kya taraqqi ki kasb-e-ilm-o-fan kar ke

bawajud-e-koshish bhi KHud ko be-hunar paya

ab to hadse dil ke yaad bhi nahin 'nudrat'

kis maqam par khoya kis maqam par paya