muKHtasar si baat ko bhi masala kahte rahe

muḳhtasar sī baat ko bhī mas.ala kahte rahe

zindagī meñ aap ko kyuuñ rahnumā kahte rahe

be-vafā hone kā fatvā de diyā un ne hameñ

umr-bhar jin ke sitam ko ham vafā kahte rahe

kar diyā mismār un ne ek pal meñ qasr-e-dil

jin ke ḳhasta ghar ko bhī ham ḳhush-numā kahte rahe

har ghaḌī har vaqt har pal har jagah be-ḳhauf ham

vo hamāre the hamāre haiñ sadā kahte rahe

dhīre dhīre chal diye us raah par ham bhī 'sabīn'

rāt-din sab jis ko ġham kī karbalā kahte rahe

muKHtasar si baat ko bhi masala kahte rahe

zindagi mein aap ko kyun rahnuma kahte rahe

be-wafa hone ka fatwa de diya un ne hamein

umr-bhar jin ke sitam ko hum wafa kahte rahe

kar diya mismar un ne ek pal mein qasr-e-dil

jin ke KHasta ghar ko bhi hum KHush-numa kahte rahe

har ghaDi har waqt har pal har jagah be-KHauf hum

wo hamare the hamare hain sada kahte rahe

dhire dhire chal diye us rah par hum bhi 'sabin'

raat-din sab jis ko gham ki karbala kahte rahe