mulaqaton ka aisa silsila rakkha hai tumne

mulāqātoñ kā aisā silsila rakkhā hai tum ne

badan kyā ruuh meñ bhī rat-jagā rakkhā hai tum ne

koī āsāñ nahīñ thā zindagī se kaT ke jiinā

bahut mushkil dinoñ meñ rābta rakkhā hai tum ne

ham aise milne vāloñ ko kahāñ us kī ḳhabar thī

na milne kā bhī koī rāsta rakkhā hai tum ne

junūñ kī hālatoñ kā ham ko andāza nahīñ thā

diye ki shah pe sūraj ko bujhā rakkhā hai tum ne

havā ko habs karnā ho to koī tum se sīkhe

darīche band darvāza khulā rakkhā hai tum ne

ab aisā hai ki duniyā se ulajhte phir rahe haiñ

ajab kaifiyatoñ meñ mubtilā rakkhā hai tum ne

ḳhizāñ jaise hare peḌoñ ko rusvā kar rahī hai

sulūk aisā hī kuchh ham se ravā rakkhā hai tum ne

rihā.ī ke liye zanjīr pahnā.ī ga.ī thī

asīrī ke liye pahrā uThā rakkhā hai tum ne

burīda aks larzāñ haiñ lahū kī vahshatoñ meñ

ye kaisā ā.īna-ḳhāna sajā rakkhā hai tum ne

jahāñ kirdār gūñge dekhne vaale haiñ andhe

isī manzar se to parda haTā rakkhā hai tum ne

mohabbat karne vaale ab kahāñ jā kar mileñge

guzargāhoñ ko to maqtal banā rakkhā hai tum ne

mulaqaton ka aisa silsila rakkha hai tum ne

badan kya ruh mein bhi rat-jaga rakkha hai tum ne

koi aasan nahin tha zindagi se kaT ke jina

bahut mushkil dinon mein rabta rakkha hai tum ne

hum aise milne walon ko kahan us ki KHabar thi

na milne ka bhi koi rasta rakkha hai tum ne

junun ki haalaton ka hum ko andaza nahin tha

diye ki shah pe suraj ko bujha rakkha hai tum ne

hawa ko habs karna ho to koi tum se sikhe

dariche band darwaza khula rakkha hai tum ne

ab aisa hai ki duniya se ulajhte phir rahe hain

ajab kaifiyaton mein mubtila rakkha hai tum ne

KHizan jaise hare peDon ko ruswa kar rahi hai

suluk aisa hi kuchh hum se rawa rakkha hai tum ne

rihai ke liye zanjir pahnai gai thi

asiri ke liye pahra uTha rakkha hai tum ne

burida aks larzan hain lahu ki wahshaton mein

ye kaisa aaina-KHana saja rakkha hai tum ne

jahan kirdar gunge dekhne wale hain andhe

isi manzar se to parda haTa rakkha hai tum ne

mohabbat karne wale ab kahan ja kar milenge

guzargahon ko to maqtal bana rakkha hai tum ne