mulamma ki farawani bahut hai

mulamma.a kī farāvānī bahut hai

magar har samt vīrānī bahut hai

haqīqat hai ye ab azhar-minashshams

faroġh-e-fitna-sāmānī bahut hai

falak par haiñ tasavvur kī kamandeñ

amal-pairā tan-āsānī bahut hai

nahīñ hai sāya-e-dīvār sar par

ġhurūr-e-zill-e-sub.hānī bahut hai

kahānī hai ye lailā-e-ḳhirad kī

ki ye fitnoñ kī dīvānī bahut hai

charāġh-e-ābla-pā.ī hai raushan

fazā-e-dasht-e-nūrānī bahut hai

badaltā hai koī sau ruup badle

vo sūrat jaanī pahchānī bahut hai

nazar sāhil pe rakh patvār par haath

ye ġham kaisā ki tuġhyānī bahut hai

ḳhudā par rakh bharosā azm dil meñ

balā se raat tūfānī bahut hai

'sahar' āsāñ nahīñ ham ko miTānā

natīje meñ pashemānī bahut hai

mulamma ki farawani bahut hai

magar har samt virani bahut hai

haqiqat hai ye ab azhar-minashshams

farogh-e-fitna-samani bahut hai

falak par hain tasawwur ki kamanden

amal-paira tan-asani bahut hai

nahin hai saya-e-diwar sar par

ghurur-e-zill-e-subhani bahut hai

kahani hai ye laila-e-KHirad ki

ki ye fitnon ki diwani bahut hai

charagh-e-abla-pai hai raushan

faza-e-dasht-e-nurani bahut hai

badalta hai koi sau rup badle

wo surat jaani pahchani bahut hai

nazar sahil pe rakh patwar par hath

ye gham kaisa ki tughyani bahut hai

KHuda par rakh bharosa azm dil mein

bala se raat tufani bahut hai

'sahar' aasan nahin hum ko miTana

natije mein pashemani bahut hai