mumkin hai gar to sare ka sara uTha ke bhag

mumkin hai gar to saare kā saarā uThā ke bhaag

varna khañDar se yaad kā malba uThā ke bhaag

puurā uThā ke bhaag yā aadhā uThā ke bhaag

ab aa gayā hai to ġham-e-duniyā uThā ke bhaag

koī zamāna aayā nahīñ hai kisī ko raas

behtar yahī hai apnā zamāna uThā ke bhaag

DhūñDe se bhī milegā tamāshā.ī kab yahāñ

qaht-ur-rijāl meñ tū tamāshā uThā ke bhaag

tishna-labī kā ab jo gila kar rahā hai dost

kis ne kahā thā sar pe tū sahrā uThā ke bhaag

manzil tire nasīb meñ likkhī nahīñ ga.ī

rasta hī dastyāb hai rasta uThā ke bhaag

'tasnīm' āḳhirash tujhe banñā hai rizq-e-ḳhāk

filhāl apne hisse kā daana uThā ke bhaag

mumkin hai gar to sare ka sara uTha ke bhag

warna khanDar se yaad ka malba uTha ke bhag

pura uTha ke bhag ya aadha uTha ke bhag

ab aa gaya hai to gham-e-duniya uTha ke bhag

koi zamana aaya nahin hai kisi ko ras

behtar yahi hai apna zamana uTha ke bhag

DhunDe se bhi milega tamashai kab yahan

qaht-ur-rijal mein tu tamasha uTha ke bhag

tishna-labi ka ab jo gila kar raha hai dost

kis ne kaha tha sar pe tu sahra uTha ke bhag

manzil tere nasib mein likkhi nahin gai

rasta hi dastyab hai rasta uTha ke bhag

'tasnim' aaKHirash tujhe banna hai rizq-e-KHak

filhaal apne hisse ka dana uTha ke bhag