mumkin hai shai wahi ho magar hu-ba-hu na ho

mumkin hai shai vahī ho magar hū-ba-hū na ho

reg-e-ravāñ bhī dekh kahīñ aabjū na ho

qaa.em isī tazād ke dam se hai kā.enāt

maiñ aarzū huuñ jis kī mirī aarzū na ho

manzar badal badal ke bhī dekhā hai bārhā

jo zaḳhm ab hai aañkh pe shāyad rafū na ho

sahtā rahā huuñ ek tasalsul se is liye

ye TūT-phūT hī mirī vaj.h-e-numū na ho

maiñ ḳhud hī bujhne lagtā huuñ jalte hue charāġh

jis roz terī lau se mirī guftugū na ho

dekho badal ke zāviya apnī nigāh kā

jo rū-ba-rū nahīñ hai vahī rū-ba-rū na ho

mere vajūd se hai ye duniyā-e-rañg-o-bū

lekin mirā jahān faqat rañg-o-bū na ho

mushkil mirī hadoñ kā ta.ayyun hai 'āftāb'

vo raushnī bhī kyā hai ki jo chaar sū na ho

mumkin hai shai wahi ho magar hu-ba-hu na ho

reg-e-rawan bhi dekh kahin aabju na ho

qaem isi tazad ke dam se hai kaenat

main aarzu hun jis ki meri aarzu na ho

manzar badal badal ke bhi dekha hai barha

jo zaKHm ab hai aankh pe shayad rafu na ho

sahta raha hun ek tasalsul se is liye

ye TuT-phuT hi meri wajh-e-numu na ho

main KHud hi bujhne lagta hun jalte hue charagh

jis roz teri lau se meri guftugu na ho

dekho badal ke zawiya apni nigah ka

jo ru-ba-ru nahin hai wahi ru-ba-ru na ho

mere wajud se hai ye duniya-e-rang-o-bu

lekin mera jahan faqat rang-o-bu na ho

mushkil meri hadon ka tayyun hai 'aftab'

wo raushni bhi kya hai ki jo chaar su na ho