mumkin nahin ki ishq mein gham se mafar mile

mumkin nahīñ ki ishq meñ ġham se mafar mile

mar jā.ūñ maiñ qarār kī sūrat agar mile

kyā kyā na zindagī meñ fareb-e-nazar mile

rahzan the asl meñ jo hameñ rāhbar mile

le kar tumhārā naam jahāñ se guzar gayā

vo ek shaḳhs jis se na tum umr bhar mile

dair-o-haram to sajdoñ kī āmājgāh haiñ

us kā nasīb jis ko tirā sañg-e-dar mile

ummīd-o-yās-o-hasrat-o-armān-o-ārzū

kyā kyā na rāh-e-ġham meñ mujhe ham-safar mile

ho jaa.e un ko apne parā.e meñ imtiyāz

yārab unheñ bhī chashm-e-haqīqat-nigar mile

dil kā magar javāb nahīñ rāh-e-ishq meñ

milne ko yuuñ hazār mujhe rāhbar mile

apnā kise banā.eñ kareñ kis kā e'tibār

naale bhī un ke halqa-ba-gosh-e-asar mile

nāseh ihānat-e-ġham-e-jānāñ nahīñ qubūl

luuñ jaan de ke mujh ko mohabbat agar mile

pahlī nazar meñ mujh ko to apnā banā liyā

ya.anī kuchh is adā se janāb-e-'sahar' mile

'sābir' junūn-e-shauq ne āsāñ banā diye

raste meñ jo maqām mujhe pur-ḳhatar mile

mumkin nahin ki ishq mein gham se mafar mile

mar jaun main qarar ki surat agar mile

kya kya na zindagi mein fareb-e-nazar mile

rahzan the asl mein jo hamein rahbar mile

le kar tumhaara nam jahan se guzar gaya

wo ek shaKHs jis se na tum umr bhar mile

dair-o-haram to sajdon ki aamajgah hain

us ka nasib jis ko tera sang-e-dar mile

ummid-o-yas-o-hasrat-o-arman-o-arzu

kya kya na rah-e-gham mein mujhe ham-safar mile

ho jae un ko apne parae mein imtiyaz

yarab unhen bhi chashm-e-haqiqat-nigar mile

dil ka magar jawab nahin rah-e-ishq mein

milne ko yun hazar mujhe rahbar mile

apna kise banaen karen kis ka e'tibar

nale bhi un ke halqa-ba-gosh-e-asar mile

naseh ihanat-e-gham-e-jaanan nahin qubul

lun jaan de ke mujh ko mohabbat agar mile

pahli nazar mein mujh ko to apna bana liya

yani kuchh is ada se janab-e-'sahar' mile

'sabir' junun-e-shauq ne aasan bana diye

raste mein jo maqam mujhe pur-KHatar mile