munafe mein kahan aisi jo lazzat hai KHasare mein

munāfe meñ kahāñ aisī jo lazzat hai ḳhasāre meñ

ye faanī zindagī jaise havā phūle ġhubāre meñ

yahāñ se ḳhush ga.ī maike vahāñ se phuul ke lauTī

bhare haiñ kaan begam ke kisī ne mere baare meñ

kisī se pūchhne par jab javāb aa.e guzārā hai

baḌā mafhūm poshīda hai samjho is guzāre meñ

havas ne zar kī mujh ko ḳhuun ke rishtoñ se uljhāyā

na aatā kaash maiñ mādām kī daulat ke laare meñ

utarte haiñ to yaaro jaan se jaane kā andesha

ba-zāhir to baḌī hī dilkashī dariyā-kināre meñ

dahakte lab ghanī zulfeñ ye palkeñ shāmiyānoñ sī

kamī kyā rah ga.ī logo mire zohra sitāre meñ

mire baabā ne ġhurbat meñ bhī rāhat kā kiyā sāmāñ

hameñ sukh de ke aksar ḳhud rahā hai ġham ke dhāre meñ

mirī maañ kī nazar meñ maiñ jahāñ se ḳhūbsūrat thā

nahīñ kuchh jāzbiyyat ab usī āñkhoñ ke taare meñ

ibādat karne vāloñ se 'rashīd' itnī guzārish hai

mohabbat hī ibādat zikr paa.eñ paare paare meñ

munafe mein kahan aisi jo lazzat hai KHasare mein

ye fani zindagi jaise hawa phule ghubare mein

yahan se KHush gai maike wahan se phul ke lauTi

bhare hain kan begam ke kisi ne mere bare mein

kisi se puchhne par jab jawab aae guzara hai

baDa mafhum poshida hai samjho is guzare mein

hawas ne zar ki mujh ko KHun ke rishton se uljhaya

na aata kash main madam ki daulat ke lare mein

utarte hain to yaro jaan se jaane ka andesha

ba-zahir to baDi hi dilkashi dariya-kinare mein

dahakte lab ghani zulfen ye palken shamiyanon si

kami kya rah gai logo mere zohra sitare mein

mere baba ne ghurbat mein bhi rahat ka kiya saman

hamein sukh de ke aksar KHud raha hai gham ke dhaare mein

meri man ki nazar mein main jahan se KHubsurat tha

nahin kuchh jazbiyyat ab usi aankhon ke tare mein

ibaadat karne walon se 'rashid' itni guzarish hai

mohabbat hi ibaadat zikr paen pare pare mein