munafiqat ka har imkan Dha ke nikle the

munāfiqat kā har imkān Dhā ke nikle the

jo ghar kī aag se dāman bachā ke nikle the

lahūluhān hue yuuñ ki kho ga.ī pahchān

ham apne chehre pe va.ade sajā ke nikle the

nigāh-e-ahl-e-havas kis liye huī ḳhāmosh

kuchh āstīn meñ ham bhī chhupā ke nikle the

ḳhudā hī jaane jabīnoñ pe nuur sā kyoñ thā

vo kaun the jo ghar apnā luTā ke nikalne the

sab ahl-e-ḳhair nahīñ hai jo milne aate haiñ

ye raaz ghar meñ ham apnā batā ke nikle the

kise ḳhabar thī ki aage bhī hai koī dīvār

ki dil se ham to ye ḳhadsha miTā ke nikle the

ba-faiz-e-chāragarī aur baḌh ga.iiñ Tīseñ

tirī galī se ajab zaḳhm khā ke nikle the

shurūa ham ne kiyā thā safar vahāñ se 'shān'

jahāñ se rāste dasht-e-balā ke nikle the

munafiqat ka har imkan Dha ke nikle the

jo ghar ki aag se daman bacha ke nikle the

lahuluhan hue yun ki kho gai pahchan

hum apne chehre pe wade saja ke nikle the

nigah-e-ahl-e-hawas kis liye hui KHamosh

kuchh aastin mein hum bhi chhupa ke nikle the

KHuda hi jaane jabinon pe nur sa kyon tha

wo kaun the jo ghar apna luTa ke nikalne the

sab ahl-e-KHair nahin hai jo milne aate hain

ye raaz ghar mein hum apna bata ke nikle the

kise KHabar thi ki aage bhi hai koi diwar

ki dil se hum to ye KHadsha miTa ke nikle the

ba-faiz-e-chaaragari aur baDh gain Tisen

teri gali se ajab zaKHm kha ke nikle the

shurua hum ne kiya tha safar wahan se 'shan'

jahan se raste dasht-e-bala ke nikle the