munfarid lahja juda tarz-e-bayan rakhte hain hum

munfarid lahja judā tarz-e-bayāñ rakhte haiñ ham

shā.erī ke vāste urdu zabāñ rakhte haiñ ham

yād-e-jānāñ meñ guzarte haiñ hamāre roz-o-shab

aur kisī kī yaad kī fursat kahāñ rakhte haiñ ham

kaun kahtā hai hamāre haath ḳhālī ho ga.e

maañ kī sūrat meñ matā-e-do-jahāñ rakhte haiñ ham

zīnat-e-mahfil baḌhāne ke liye ai jān-e-jāñ

terī yādoñ kā diyā bhī darmiyāñ rakhte haiñ ham

āsmān-e-ġham kā sūraj ham ko kyā jhulsā.egā

terī ulfat kā jo sar par sā.ebāñ rakhte haiñ ham

pesh-e-zālim jur.at-e-iz.hār-e-haq hotī nahīñ

zāhiran rakhne ko bas muñh meñ zabāñ rakhte haiñ ham

kyā huā 'nūrī' agar ye jism būḌhā ho gayā

jazba-e-ishq-o-mohabbat to javāñ rakhte haiñ ham

munfarid lahja juda tarz-e-bayan rakhte hain hum

shaeri ke waste urdu zaban rakhte hain hum

yaad-e-jaanan mein guzarte hain hamare roz-o-shab

aur kisi ki yaad ki fursat kahan rakhte hain hum

kaun kahta hai hamare hath KHali ho gae

man ki surat mein mata-e-do-jahan rakhte hain hum

zinat-e-mahfil baDhane ke liye ai jaan-e-jaan

teri yaadon ka diya bhi darmiyan rakhte hain hum

aasman-e-gham ka suraj hum ko kya jhulsaega

teri ulfat ka jo sar par saeban rakhte hain hum

pesh-e-zalim jurat-e-izhaar-e-haq hoti nahin

zahiran rakhne ko bas munh mein zaban rakhte hain hum

kya hua 'nuri' agar ye jism buDha ho gaya

jazba-e-ishq-o-mohabbat to jawan rakhte hain hum