munh andhere chamanistan ka paikar le kar

muñh añdhere chamanistān kā paikar le kar

kaun guzrā hai dabe paañv gul-e-tar le kar

mujh ko shāhī meñ faqīrī kā mazā aatā hai

kyā karūñgā maiñ sikandar kā muqaddar le kar

kaun aaya hai bayābāñ meñ ki sannāTā hai

apnī āñkhoñ meñ chaman-zār kā manzar le kar

tere kūche meñ ba-sad shauq luTā aaya huuñ

apnā sarmāya-e-dil tere barābar le kar

kūcha-e-shahr-e-nigārāñ meñ phirā hai barsoñ

shauq-e-āvāra-mizājī mujhe dar-dar le kar

ham ne jugnū ko añdheroñ meñ bhaTakte dekhā

apnī muTThī meñ ujāloñ kā muqaddar le kar

qadr-e-mehnat na huī saare zamāne meñ 'la.īq'

lauT aaya maiñ ḳhayālāt ke jauhar le kar

munh andhere chamanistan ka paikar le kar

kaun guzra hai dabe panw gul-e-tar le kar

mujh ko shahi mein faqiri ka maza aata hai

kya karunga main sikandar ka muqaddar le kar

kaun aaya hai bayaban mein ki sannaTa hai

apni aankhon mein chaman-zar ka manzar le kar

tere kuche mein ba-sad shauq luTa aaya hun

apna sarmaya-e-dil tere barabar le kar

kucha-e-shahr-e-nigaran mein phira hai barson

shauq-e-awara-mizaji mujhe dar-dar le kar

hum ne jugnu ko andheron mein bhaTakte dekha

apni muTThi mein ujalon ka muqaddar le kar

qadr-e-mehnat na hui sare zamane mein 'laiq'

lauT aaya main KHayalat ke jauhar le kar