munh dekha kiye hum aaine ka

muñh dekhā kiye ham aa.ine kā

hāsil hai yahī to ratjage kā

aa.eñ jo pahāḌ bhī to kyā ġham

raahī huuñ havā ke rāste kā

dil hai mirā ḳhānqāh merī

maiñ miir huuñ apne silsile kā

kyā ab hai hunar-varī meñ rakkhā

ye daur hai dhun kā aur gale kā

baiThe haiñ sarāb har qadam par

mumkin nahīñ bachnā qāfile kā

haiñ saarī jihāt dastaras meñ

be-kār hai zikr fāsle kā

ḳhud meñ to nahīñ hai kuchh añdherā

ghar jhāñk rahā hai dūsre kā

dīvār-e-anā giregī kaise

hal koī nikālo mas.ale kā

ho jaa.eñ judā to mar hī jaa.eñ

rishta hai lavoñ se kyā diye kā

kahnā to bahut maiñ chāhtā huuñ

dāman hai tañg qāfiye kā

ash.ār-e-'mujīb' paḌh ke dekho

māhir huuñ har ek zāviye kā

munh dekha kiye hum aaine ka

hasil hai yahi to ratjage ka

aaen jo pahaD bhi to kya gham

rahi hun hawa ke raste ka

dil hai mera KHanqah meri

main mir hun apne silsile ka

kya ab hai hunar-wari mein rakkha

ye daur hai dhun ka aur gale ka

baiThe hain sarab har qadam par

mumkin nahin bachna qafile ka

hain sari jihat dastaras mein

be-kar hai zikr fasle ka

KHud mein to nahin hai kuchh andhera

ghar jhank raha hai dusre ka

diwar-e-ana giregi kaise

hal koi nikalo masale ka

ho jaen juda to mar hi jaen

rishta hai lawon se kya diye ka

kahna to bahut main chahta hun

daman hai tang qafiye ka

ashaar-e-'mujib' paDh ke dekho

mahir hun har ek zawiye ka