munh se go wo kuchh na kahen par aankhen sab kuchh bolen hain

muñh se go vo kuchh na kaheñ par āñkheñ sab kuchh boleñ haiñ

ab to vo bhī tanhā.ī meñ chupke chupke ro leñ haiñ

ham ne sa.ī-e-zabt bahut kī aañsū phir bhī aa hī ga.e

in ashkoñ kā yaar burā ho rāz-e-dil sab kholeñ haiñ

kaun sunegā kis ko fursat kis ko sunā.eñ kis se kaheñ

ab to ham dukh dard bhī apnā ġhazloñ hī meñ samo leñ haiñ

apnī to fitrat hī azal se hai kaafī dushvār-pasand

ham to apnī raah meñ yaaro ḳhud hī kāñTe bo leñ haiñ

ham se bhī Tuk nazar milāo kabhū kabhū kuchh baat karo

ham bhī 'mīr' ke shaidā.ī haiñ 'mīr' kī bolī boleñ haiñ

sun ke vo 'rahmat' kī ġhazleñ hañs ke ye farmāne lage

in ġhazloñ ke parde meñ to 'mīr' kī ġhazleñ boleñ haiñ

munh se go wo kuchh na kahen par aankhen sab kuchh bolen hain

ab to wo bhi tanhai mein chupke chupke ro len hain

hum ne sai-e-zabt bahut ki aansu phir bhi aa hi gae

in ashkon ka yar bura ho raaz-e-dil sab kholen hain

kaun sunega kis ko fursat kis ko sunaen kis se kahen

ab to hum dukh dard bhi apna ghazlon hi mein samo len hain

apni to fitrat hi azal se hai kafi dushwar-pasand

hum to apni rah mein yaro KHud hi kanTe bo len hain

hum se bhi Tuk nazar milao kabhu kabhu kuchh baat karo

hum bhi 'mir' ke shaidai hain 'mir' ki boli bolen hain

sun ke wo 'rahmat' ki ghazlen hans ke ye farmane lage

in ghazlon ke parde mein to 'mir' ki ghazlen bolen hain