munh se jo milaiye kisi ko

muñh se jo milā.iye kisī ko

kyuuñ daaġh lagā.iye kisī ko

ā.īna-e-kaj-numā haiñ ahbāb

sūrat na dikhā.iye kisī ko

jo sūrat-e-zaḳhm ḳhuun ro de

aisā na hañsā.iye kisī ko

kuchh ḳhuub nahīñ hai ādat-e-zulm

hargiz na satā.iye kisī ko

dīvār se koī phoḌegā sar

dar se na uThā.iye kisī ko

mushtāq hai koī zer-e-dīvār

āvāz sunā.iye kisī ko

mushkil hai bigāḌ kar banānā

hargiz na miTā.iye kisī ko

is fikr meñ hai mirā parī-rū

dīvāna banā.iye kisī ko

hotā hai 'shu.ūr' dard dil meñ

phoḌā ye dikhā.iye kisī ko

munh se jo milaiye kisi ko

kyun dagh lagaiye kisi ko

aaina-e-kaj-numa hain ahbab

surat na dikhaiye kisi ko

jo surat-e-zaKHm KHun ro de

aisa na hansaiye kisi ko

kuchh KHub nahin hai aadat-e-zulm

hargiz na sataiye kisi ko

diwar se koi phoDega sar

dar se na uThaiye kisi ko

mushtaq hai koi zer-e-diwar

aawaz sunaiye kisi ko

mushkil hai bigaD kar banana

hargiz na miTaiye kisi ko

is fikr mein hai mera pari-ru

diwana banaiye kisi ko

hota hai 'shuur' dard dil mein

phoDa ye dikhaiye kisi ko