munh tera kyun aaj zor-e-na-tawani phir gaya

muñh tirā kyuuñ aaj zor-e-nā-tavānī phir gayā

us ke aate hī mire chehre pe paanī phir gayā

bhuul kar āshiq tumhārā jā rahā thā tuur par

duur se sun kar sadā-e-lan-tarānī phir gayā

zillat-o-rusvā.ī kī had bhī hai koī Duub mar

ai dil-e-nākām ab to sar pe paanī phir gayā

us ke aage tū ne phailāyā agar dast-e-savāl

yaad rakh ai dil sulūk-e-mehrbānī phir gayā

dil miTāyā terī ḳhātir jaan kī parvā na kī

kis liye tū ham se ai ahd-e-javānī phir gayā

be-sutūñ ko kaaT kar laayā thā zālim jū-e-shīr

kohkan kī hasratoñ par phir bhī paanī phir gayā

pattiyāñ pazhmurda phūloñ kī chaman meñ dekh kar

sāmne āñkhoñ ke daur-e-aish-e-fānī phir gayā

kal khilī thī jo kalī hai aaj murjhā.ī huī

merī nazroñ meñ ma.āl-e-zindagānī phir gayā

bul-havas kā muñh ho kaalā kaan meñ kyā kah diyā

aap ke chehre pe rañg-e-arġhavānī phir gayā

barq ban kar aaj vo mahfil meñ aa.e is tarah

merī āñkhoñ meñ mirā ahd-e-javānī phir gayā

bhar ke saaqī ne diyā jām-e-sharāb-e-arġhavāñ

'shād' ke chehre pe rañg-e-shādmānī phir gayā

munh tera kyun aaj zor-e-na-tawani phir gaya

us ke aate hi mere chehre pe pani phir gaya

bhul kar aashiq tumhaara ja raha tha tur par

dur se sun kar sada-e-lan-tarani phir gaya

zillat-o-ruswai ki had bhi hai koi Dub mar

ai dil-e-nakaam ab to sar pe pani phir gaya

us ke aage tu ne phailaya agar dast-e-sawal

yaad rakh ai dil suluk-e-mehrbani phir gaya

dil miTaya teri KHatir jaan ki parwa na ki

kis liye tu hum se ai ahd-e-jawani phir gaya

be-sutun ko kaT kar laya tha zalim ju-e-shir

kohkan ki hasraton par phir bhi pani phir gaya

pattiyan pazhmurda phulon ki chaman mein dekh kar

samne aankhon ke daur-e-aish-e-fani phir gaya

kal khili thi jo kali hai aaj murjhai hui

meri nazron mein maal-e-zindagani phir gaya

bul-hawas ka munh ho kala kan mein kya kah diya

aap ke chehre pe rang-e-arghawani phir gaya

barq ban kar aaj wo mahfil mein aae is tarah

meri aankhon mein mera ahd-e-jawani phir gaya

bhar ke saqi ne diya jam-e-sharab-e-arghawan

'shad' ke chehre pe rang-e-shadmani phir gaya