munhadim hoti hui aabaadiyon mein fursat-e-yak-KHwab hote

munhadim hotī huī ābādiyoñ meñ fursat-e-yak-ḳhvāb hote

ham bhī apne ḳhisht-zāroñ ke liye āsūdgī kā baab hote

shahr-e-āzurda-fazā meñ ābgīnoñ ko ba-rū-e-kār laate

shaam kī in ḳhānumāñ vīrāniyoñ meñ sohbat-e-ahbāb hote

taaza o ġhamnāk rakhte aas aur ummīd kī sab koñpaloñ ko

aur phir hamrāhī-e-bād-e-shabāna ke liye mahtāb hote

ḳhud-kalāmī ke bhañvar meñ Dūbtī parchhā.īñ ban kar rah ga.e haiñ

is añdherī raat meñ ghar se nikalte to sitāra-yāb hote

ḳhāk-ālūda zamānoñ par barastī jhūmtī kaalī ghaTā.eñ

mausamoñ kī āb-o-ḳhāk-ārā.iyoñ se aa.ine sairāb hote

munhadim hoti hui aabaadiyon mein fursat-e-yak-KHwab hote

hum bhi apne KHisht-zaron ke liye aasudgi ka bab hote

shahr-e-azurda-faza mein aabginon ko ba-ru-e-kar late

sham ki in KHanuman viraniyon mein sohbat-e-ahbab hote

taza o ghamnak rakhte aas aur ummid ki sab konpalon ko

aur phir hamrahi-e-baad-e-shabana ke liye mahtab hote

KHud-kalami ke bhanwar mein Dubti parchhain ban kar rah gae hain

is andheri raat mein ghar se nikalte to sitara-yab hote

KHak-aluda zamanon par barasti jhumti kali ghaTaen

mausamon ki aab-o-KHak-araiyon se aaine sairab hote