munim na hath khinch madad se gharib ki

mun'im na haath khīñch madad se ġharīb kī

rozī hai tere rizq meñ us ke nasīb kī

hairān-kun thī chup bhī tumhārī mire liye

bole ho ab to baat bhī tum ne 'ajīb kī

sāmān-e-'aish dekh ke bazm-e-nashāt meñ

rahtī hai yaad kis ko nasīhat tabīb kī

kab tak karoge ahl-e-siyāsat pe e'tibār

yaaro kabhī suno kisī shā'ir adiib kī

ho jin kī sab tavajjoh samundar ke us taraf

un ko sadā sunā.ī na degī qarīb kī

sīna-ba-sīna kartī hai ye har taraf safar

haq baat ko nahīñ hai zarūrat naqīb kī

'bāsir' bilā muqābla vo muntaḳhab huā

merī shikasta-pā.ī hai mohsin raqīb kī

mun'im na hath khinch madad se gharib ki

rozi hai tere rizq mein us ke nasib ki

hairan-kun thi chup bhi tumhaari mere liye

bole ho ab to baat bhi tum ne 'ajib ki

saman-e-'aish dekh ke bazm-e-nashat mein

rahti hai yaad kis ko nasihat tabib ki

kab tak karoge ahl-e-siyasat pe e'tibar

yaro kabhi suno kisi sha'ir adib ki

ho jin ki sab tawajjoh samundar ke us taraf

un ko sada sunai na degi qarib ki

sina-ba-sina karti hai ye har taraf safar

haq baat ko nahin hai zarurat naqib ki

'basir' bila muqabla wo muntaKHab hua

meri shikasta-pai hai mohsin raqib ki