munsif-e-waqt se begana guzarna hoga

munsif-e-vaqt se begāna guzarnā hogā

faisla apnā hameñ aap hī karnā hogā

zaḳhm-e-ehsās kabhī chain na lene degā

sar-e-maidān-e-tamannā hameñ marnā hogā

tujhe chhū kar bhī tujhe pā na sakeñge to hameñ

sūrat-e-dard tire dil meñ utarnā hogā

jaane le aa.ī kahāñ tezi-e-raftār hameñ

ki Thahar jaa.eñ to sadiyoñ kā Thaharnā hogā

asr-e-hāzir meñ hai jiinā hī jihād-e-akbar

jis kī ḳhātir hameñ har shai se guzarnā hogā

hashr se kam na kisī din ke jhamele hoñge

ik qayāmat hameñ har shab kā guzarnā hogā

ro.eñ kyā Dūbte sūraj ke liye ham 'rūhī'

ki na.ī shaan se kal us ko ubharnā hogā

munsif-e-waqt se begana guzarna hoga

faisla apna hamein aap hi karna hoga

zaKHm-e-ehsas kabhi chain na lene dega

sar-e-maidan-e-tamanna hamein marna hoga

tujhe chhu kar bhi tujhe pa na sakenge to hamein

surat-e-dard tere dil mein utarna hoga

jaane le aai kahan tezi-e-raftar hamein

ki Thahar jaen to sadiyon ka Thaharna hoga

asr-e-hazir mein hai jina hi jihad-e-akbar

jis ki KHatir hamein har shai se guzarna hoga

hashr se kam na kisi din ke jhamele honge

ek qayamat hamein har shab ka guzarna hoga

roen kya Dubte suraj ke liye hum 'ruhi'

ki nai shan se kal us ko ubharna hoga