muntashir ho gae afsos jigar ke TukDe

muntashir ho ga.e afsos jigar ke TukḌe

log taqsīm hue ho ga.e ghar ke TukḌe

hadd-e-parvāz se aage ai parinde na nikal

shauq-e-parvāz na kar de tire par ke TukḌe

ghar se niklūñgā to manzil pe rukūñgā jā kar

mujh ko manzūr nahīñ apne safar ke TukḌe

kis ne ā.īne meñ ye barq-e-tajallī rakh dī

aa.ina dekhūñ to hote haiñ nazar ke TukḌe

ye mire she'r nahīñ nuur kī qindīleñ haiñ

maiñ ne kāġhaz pe sajā.e haiñ qamar ke TukḌe

maiñ ne barsoñ jo use ḳhuun pilāyā apnā

tum se ho sakte nahīñ mere hunar ke TukḌe

nāḳhudā se kaho uksā.e na 'dānish' mujh ko

zid pe ā.ūñgā to kar dūñgā bhañvar ke TukḌe

muntashir ho gae afsos jigar ke TukDe

log taqsim hue ho gae ghar ke TukDe

hadd-e-parwaz se aage ai parinde na nikal

shauq-e-parwaz na kar de tere par ke TukDe

ghar se niklunga to manzil pe rukunga ja kar

mujh ko manzur nahin apne safar ke TukDe

kis ne aaine mein ye barq-e-tajalli rakh di

aaina dekhun to hote hain nazar ke TukDe

ye mere she'r nahin nur ki qindilen hain

main ne kaghaz pe sajae hain qamar ke TukDe

main ne barson jo use KHun pilaya apna

tum se ho sakte nahin mere hunar ke TukDe

naKHuda se kaho uksae na 'danish' mujh ko

zid pe aaunga to kar dunga bhanwar ke TukDe