muntashir shahzad-gan-e-dil ka shiraaza na ho

muntashir shahzād-gān-e-dil kā shīrāza na ho

kaash yāroñ kī hañsī fitnoñ kā ġhammāza na ho

ab vo sone kā sahī lekin mire kis kaam kā

jis makāñ meñ koī khiḌkī koī darvāza na ho

vo javāñ ḳhuun aur us par nashsha-e-dīda-varī

kyā kareñ vo bhī jo mere ġham kā andāza na ho

yaad hai kuchh tum ne kal ḳhāka uḌāyā thā mirā

phuul sī āñkhoñ meñ shabnam kal kā ḳhamyāza na ho

phir junūñ kyūñ-kar saje duniyā ko kaise rañg de

bā.is-e-tahrīk agar yāroñ kā āvāza na ho

kaash mere ġham kā saaya bhī rahe apnoñ se duur

kaash ab yakjā mirī yādoñ kā shīrāza na ho

aa gale milne se pahle kyuuñ na mil kar dekh leñ

dil ke tah-ḳhāne meñ koī chor darvāza na ho

vo to murda haiñ unheñ ehsās kī ḳhushbū se kyā

apne andāz-e-nazar kā jin ko andāza na ho

kaash ai 'ġhausī' zamāne bhar kā bachpan lauT aa.e

sab ke chehroñ par haqīqī nuur ho ġhāza na ho

muntashir shahzad-gan-e-dil ka shiraaza na ho

kash yaron ki hansi fitnon ka ghammaza na ho

ab wo sone ka sahi lekin mere kis kaam ka

jis makan mein koi khiDki koi darwaza na ho

wo jawan KHun aur us par nashsha-e-dida-wari

kya karen wo bhi jo mere gham ka andaza na ho

yaad hai kuchh tum ne kal KHaka uDaya tha mera

phul si aankhon mein shabnam kal ka KHamyaza na ho

phir junun kyun-kar saje duniya ko kaise rang de

bais-e-tahrik agar yaron ka aawaza na ho

kash mere gham ka saya bhi rahe apnon se dur

kash ab yakja meri yaadon ka shiraaza na ho

aa gale milne se pahle kyun na mil kar dekh len

dil ke tah-KHane mein koi chor darwaza na ho

wo to murda hain unhen ehsas ki KHushbu se kya

apne andaz-e-nazar ka jin ko andaza na ho

kash ai 'ghausi' zamane bhar ka bachpan lauT aae

sab ke chehron par haqiqi nur ho ghaza na ho