muntashir tare piro kar kahkashan paida karo

muntashir taare piro kar kahkashāñ paidā karo

bhiiḌ se afrād kī ik kārvāñ paidā karo

aur sab kuchh baad meñ ai sāhibān-e-taḳht-o-tāj

sab se pahle mulk meñ amn-o-amāñ paidā karo

surḳh-rū kar de tumheñ ik baar phir aqvām meñ

apne andar aisī vaz.a-e-raftagāñ paidā karo

sa.ī-e-paiham aur īmāñ lāzim-o-malzūm haiñ

misl-e-marva paañv se āb-e-ravāñ paidā karo

aah se mazlūm kī ātish-fishāñ bedār kar

jo jalā kar ḳhaak kar de vo fuġhāñ paidā karo

ġharq kar do zālimoñ ke daur-e-istibdād ko

arq-e-peshānī se bahr-e-be-karāñ paidā karo

bastiyāñ ābād kar do shahr-e-jāñ raushan karo

sho.ala-e-soz-e-nihāñ se bijliyāñ paidā karo

hijrateñ kab tak karoge charḳh-e-kohna ke tale

ik zamīñ mahfūz aur ik āsmāñ paidā karo

āsmāñ-bandī karo haaro na hargiz hausla

ek par hī bas nahīñ saat āsmāñ paidā karo

kuchh zarūrī to nahīñ 'shāhid' ki laao jū-e-shīr

mashq-e-tesha ke liye koh-e-girāñ paidā karo

muntashir tare piro kar kahkashan paida karo

bhiD se afrad ki ek karwan paida karo

aur sab kuchh baad mein ai sahiban-e-taKHt-o-taj

sab se pahle mulk mein amn-o-aman paida karo

surKH-ru kar de tumhein ek bar phir aqwam mein

apne andar aisi waza-e-raftagan paida karo

sai-e-paiham aur iman lazim-o-malzum hain

misl-e-marwa panw se aab-e-rawan paida karo

aah se mazlum ki aatish-fishan bedar kar

jo jala kar KHak kar de wo fughan paida karo

gharq kar do zalimon ke daur-e-istibdad ko

arq-e-peshani se bahr-e-be-karan paida karo

bastiyan aabaad kar do shahr-e-jaan raushan karo

shoala-e-soz-e-nihan se bijliyan paida karo

hijraten kab tak karoge charKH-e-kohna ke tale

ek zamin mahfuz aur ek aasman paida karo

aasman-bandi karo haaro na hargiz hausla

ek par hi bas nahin sat aasman paida karo

kuchh zaruri to nahin 'shahid' ki lao ju-e-shir

mashq-e-tesha ke liye koh-e-giran paida karo