muntazir aankhon mein jamta KHun ka dariya dekhte

muntazir āñkhoñ meñ jamtā ḳhuuñ kā dariyā dekhte

tum nahīñ aate to saarī umr rasta dekhte

vus.at-e-kaun-o-makāñ is regzār-e-dil meñ hai

aarzū hai tum bhī aa kar dil kā sahrā dekhte

apne marne kī ḳhabar ik din uḌāte kaash ham

chāhne vāloñ kā apne phir tamāshā dekhte

sar pe sūraj aa gayā phir bhī na kholī ham ne aañkh

sub.h uThte bhī to āḳhir kis kā chehra dekhte

is jahān-e-rañg-o-bū meñ dekhne ko kyā rahā

tujh ko dekhā aur in āñkhoñ se ham kyā dekhte

tere gāloñ ke muqābil dil meñ hasrat rah ga.ī

ek din to ham shafaq kā rañg gahrā dekhte

saare chehre dekh Daale saarī duniyā chhān lī

justujū ab tak yahī hai koī tum sā dekhte

saare lamhe yaad aate jo guzāre tere saath

jañgaloñ meñ aag ko jab ham dahaktā dekhte

kyā patā siina jalā detī hamārā ġham kī aag

ham jo apnī tarah 'āzar' us ko tanhā dekhte

muntazir aankhon mein jamta KHun ka dariya dekhte

tum nahin aate to sari umr rasta dekhte

wusat-e-kaun-o-makan is regzar-e-dil mein hai

aarzu hai tum bhi aa kar dil ka sahra dekhte

apne marne ki KHabar ek din uDate kash hum

chahne walon ka apne phir tamasha dekhte

sar pe suraj aa gaya phir bhi na kholi hum ne aankh

subh uThte bhi to aaKHir kis ka chehra dekhte

is jahan-e-rang-o-bu mein dekhne ko kya raha

tujh ko dekha aur in aankhon se hum kya dekhte

tere galon ke muqabil dil mein hasrat rah gai

ek din to hum shafaq ka rang gahra dekhte

sare chehre dekh Dale sari duniya chhan li

justuju ab tak yahi hai koi tum sa dekhte

sare lamhe yaad aate jo guzare tere sath

jangalon mein aag ko jab hum dahakta dekhte

kya pata sina jala deti hamara gham ki aag

hum jo apni tarah 'azar' us ko tanha dekhte