muntazir hai dast-e-qatil mein khula KHanjar chalo

muntazir hai dast-e-qātil meñ khulā ḳhanjar chalo

ham bhī dekheñ aaj apne qatl kā manzar chalo

kuchh to TuuTe is ghuTan kī zahr-nākī kā tilism

āñdhiyo ab ke baras tum shahr ke andar chalo

ye vo shabnam hai jo andar se jalā detī hai jism

āgahī kī sho'la-sāmānī se bach bach kar chalo

parda-poshī se haqā.eq to badal sakte nahīñ

lo tumheñ bhī farz kar lete haiñ paiġhambar chalo

aap kī gardan pe kyoñ teġh-e-sitam-pesha chalī

ham to qātil kī nazar meñ the kashīda-sar chalo

dil meñ paidā hī na hogā sair-e-gulshan kā ḳhayāl

tum zarā kuchh duur mere saath kāñToñ par chalo

duur tak phailā ho jaise shab kā sannāTā 'azīz'

aao pheñkeñ zindagī ke bahr meñ patthar chalo

muntazir hai dast-e-qatil mein khula KHanjar chalo

hum bhi dekhen aaj apne qatl ka manzar chalo

kuchh to TuTe is ghuTan ki zahr-naki ka tilism

aandhiyo ab ke baras tum shahr ke andar chalo

ye wo shabnam hai jo andar se jala deti hai jism

aagahi ki sho'la-samani se bach bach kar chalo

parda-poshi se haqaeq to badal sakte nahin

lo tumhein bhi farz kar lete hain paighambar chalo

aap ki gardan pe kyon tegh-e-sitam-pesha chali

hum to qatil ki nazar mein the kashida-sar chalo

dil mein paida hi na hoga sair-e-gulshan ka KHayal

tum zara kuchh dur mere sath kanTon par chalo

dur tak phaila ho jaise shab ka sannaTa 'aziz'

aao phenken zindagi ke bahr mein patthar chalo