muqabil der tak raushan sitara chahiye kuchh aur

muqābil der tak raushan sitāra chāhiye kuchh aur

añdhere kā ahāta pāra-pāra chāhiye kuchh aur

kahīñ bhī der tak Tiknā gavāra hai nahīñ us ko

nigāh-e-yār ko har pal nazāra chāhiye kuchh aur

safar meñ jhiil ke jab naav apnī nā-rasā Thahrī

khulā mujh par ki is bābat shikārā chāhiye kuchh aur

ajab kyā ki badan kī jal-bujhī sī raakh ke andar

sulag uThne pe āmāda sharāra chāhiye kuchh aur

ubhartī TūTtī maujoñ se andāza nahīñ hotā

samundar meñ ravānī kā ishāra chāhiye kuchh aur

jarā.id aur bhī aage mire 'shahzād' haiñ lekin

marātib ke havāle se shumāra chāhiye kuchh aur

muqabil der tak raushan sitara chahiye kuchh aur

andhere ka ahata para-para chahiye kuchh aur

kahin bhi der tak Tikna gawara hai nahin us ko

nigah-e-yar ko har pal nazara chahiye kuchh aur

safar mein jhil ke jab naw apni na-rasa Thahri

khula mujh par ki is babat shikara chahiye kuchh aur

ajab kya ki badan ki jal-bujhi si rakh ke andar

sulag uThne pe aamada sharara chahiye kuchh aur

ubharti TuTti maujon se andaza nahin hota

samundar mein rawani ka ishaara chahiye kuchh aur

jaraid aur bhi aage mere 'shahzad' hain lekin

maraatib ke hawale se shumara chahiye kuchh aur