muqawamat hai tera ghurur aur bad-kalami

muqāvamat hai tirā ġhurūr aur bad-kalāmī

mufāhamat hai hamārī hujjat kī nā-tamāmī

hurūf-e-kūchak meñ garche likkhā hai nām-e-nāmī

magar hai phir bhī jarīda-e-shā.erī girāmī

darūñ to us kā nashāt-ḳhez-o-fusūñ-asar hai

muzā.iqa kyā agarche hai sar-varaq meñ ḳhāmī

na.e mazāmīñ na.e asālīb sūjhte kyā

ki terī qismat meñ hai rivāyāt kī ġhulāmī

ajab chalan hai ki log bachche ko gāliyāñ deñ

agarche haiñ vāldain bachcha nahīñ harāmī

sharāra-pardāz hai tirī barhamī kā aalam

ġhusaile abrū haiñ tiir teġhoñ kī be-niyāmī

kareñ na kyoñ tere husn par naaz sabza-o-gul

ki zīnat-afroz baaġh hai terī ḳhush-ḳhirāmī

sitam mujhe baat baat par sher sūjhte haiñ

balā-e-jāñ ban ga.ī mirī qādir-ul-kalāmī

ye mujh se naqqād-e-be-ḳhabar pūchhtā hai aksar

nahīñ hai kyoñ merī shā.erī meñ ġham-e-avāmī

azal abad par muhīt huuñ maiñ basīt huuñ maiñ

vajūd merā na ibtidā.ī na iḳhtitāmī

koī na samjhe koī na jaane tire fasāne

ajab ye maayā ajab ye sansār hai suvāmī

hamesha rakhtī hai dil ko betāb 'krishn-mohan’

ajiib ehsās hai mirī hairat-e-davāmī

muqawamat hai tera ghurur aur bad-kalami

mufahamat hai hamari hujjat ki na-tamami

huruf-e-kuchak mein garche likkha hai nam-e-nami

magar hai phir bhi jarida-e-shaeri girami

darun to us ka nashat-KHez-o-fusun-asar hai

muzaiqa kya agarche hai sar-waraq mein KHami

nae mazamin nae asalib sujhte kya

ki teri qismat mein hai riwayat ki ghulami

ajab chalan hai ki log bachche ko galiyan den

agarche hain waldain bachcha nahin harami

sharara-pardaz hai teri barhami ka aalam

ghusaile abru hain tir teghon ki be-niyami

karen na kyon tere husn par naz sabza-o-gul

ki zinat-afroz bagh hai teri KHush-KHirami

sitam mujhe baat baat par sher sujhte hain

bala-e-jaan ban gai meri qadir-ul-kalami

ye mujh se naqqad-e-be-KHabar puchhta hai aksar

nahin hai kyon meri shaeri mein gham-e-awami

azal abad par muhit hun main basit hun main

wajud mera na ibtidai na iKHtitami

koi na samjhe koi na jaane tere fasane

ajab ye maya ajab ye sansar hai suwami

hamesha rakhti hai dil ko betab 'krishn-mohan’

ajib ehsas hai meri hairat-e-dawami