muqaddar ki kyon hum shikayat karen

muqaddar kī kyoñ ham shikāyat kareñ

jo mil jaa.e us par qanā.at kareñ

ḳhirad be-amal be-yaqīñ kam-nazar

jahāñ meñ junūñ kī himāyat kareñ

munāsib hai islāh apnī hameñ

na auroñ ko hargiz hidāyat kareñ

har ik se mohabbat har ik par karam

na hargiz kisī se adāvat kareñ

gulistāñ ko baḳhsheñ na.ī zindagī

gul-o-nastaran kī hifāzat kareñ

butoñ kā agar faiz darkār hai

to siine meñ paidā harārat kareñ

rakheñ buġhz-o-kīna se dil pāk-sāf

na dair-o-haram kī ziyārat kareñ

javāno uTho nau-javāno uTho

sitam ke ḳhilāf ab baġhāvat kareñ

bashar se hai 'lāġhar' mohabbat agar

na be-shak ḳhudā kī ibādat kareñ

muqaddar ki kyon hum shikayat karen

jo mil jae us par qanaat karen

KHirad be-amal be-yaqin kam-nazar

jahan mein junun ki himayat karen

munasib hai islah apni hamein

na auron ko hargiz hidayat karen

har ek se mohabbat har ek par karam

na hargiz kisi se adawat karen

gulistan ko baKHshen nai zindagi

gul-o-nastaran ki hifazat karen

buton ka agar faiz darkar hai

to sine mein paida hararat karen

rakhen bughz-o-kina se dil pak-saf

na dair-o-haram ki ziyarat karen

jawano uTho nau-jawano uTho

sitam ke KHilaf ab baghawat karen

bashar se hai 'laghar' mohabbat agar

na be-shak KHuda ki ibaadat karen