murda ragon mein KHun ki garmi kahan se aai

murda ragoñ meñ ḳhuun kī garmī kahāñ se aa.ī

thī shāḳh sabz phuul meñ surḳhī kahāñ se aa.ī

ye umr-e-rā.egāñ ye safar ḳhvāb meñ kaTā

phir ye thakan ye paañv pe miTTī kahāñ se aa.ī

dīvār ḳhūñ-chakāñ na mirā zaḳhm-e-sar hai surḳh

ye maslahat batā dil-e-vahshī kahāñ se aa.ī

maiñ sulh jo huā ġhalat ilzām se ḳhafā

ab pūchhte ho baat meñ talḳhī kahāñ se aa.ī

ilzām tum pe hai lab-e-goyā gurez kā

bebāk ho to phir ye ḳharābī kahāñ se aa.ī

mujh jaisā kam-suḳhan bhī hai is baar saḳht-go

is sust āb-jū meñ ravānī kahāñ se aa.ī

khiltā hai mausamoñ ke taġhayyur kā mujh se rañg

āḳhir mire ḳhamīr kī miTTī kahāñ se aa.ī

murda ragon mein KHun ki garmi kahan se aai

thi shaKH sabz phul mein surKHi kahan se aai

ye umr-e-raegan ye safar KHwab mein kaTa

phir ye thakan ye panw pe miTTi kahan se aai

diwar KHun-chakan na mera zaKHm-e-sar hai surKH

ye maslahat bata dil-e-wahshi kahan se aai

main sulh jo hua ghalat ilzam se KHafa

ab puchhte ho baat mein talKHi kahan se aai

ilzam tum pe hai lab-e-goya gurez ka

bebak ho to phir ye KHarabi kahan se aai

mujh jaisa kam-suKHan bhi hai is bar saKHt-go

is sust aab-ju mein rawani kahan se aai

khilta hai mausamon ke taghayyur ka mujh se rang

aaKHir mere KHamir ki miTTi kahan se aai