musafirat ke tahayyur se kaT ke kab aae

musāfirat ke tahayyur se kaT ke kab aa.e

jo chauthī samt ko nikle palaT ke kab aa.e

ab apne aks ko pahchānñā bhī mushkil hai

ham apne aap meñ hairat se haT ke kab aa.e

ik intishār thā ghar meñ bhī ghar se bāhar bhī

sañvar ke nikle the kis din simaT ke kab aa.e

ham aise ḳhalvatiyoñ se mukālme ko ye log

jahān bhar kī sadāoñ se aT ke kab aa.e

ye guftugū to hai radd-e-amal tirī chup kā

jo kah rahe haiñ ye ham ghar se raT ke kab aa.e

jab apne aap meñ masrūf ho gayā vo bahut

ham us kī samt zamāne se kaT ke kab aa.e

'riyāz' dhyān ham-āġhosh aa.ine se rahā

ḳhayāl us ke tasavvur se haT ke kab aa.e

musafirat ke tahayyur se kaT ke kab aae

jo chauthi samt ko nikle palaT ke kab aae

ab apne aks ko pahchanna bhi mushkil hai

hum apne aap mein hairat se haT ke kab aae

ek intishaar tha ghar mein bhi ghar se bahar bhi

sanwar ke nikle the kis din simaT ke kab aae

hum aise KHalwatiyon se mukalme ko ye log

jahan bhar ki sadaon se aT ke kab aae

ye guftugu to hai radd-e-amal teri chup ka

jo kah rahe hain ye hum ghar se raT ke kab aae

jab apne aap mein masruf ho gaya wo bahut

hum us ki samt zamane se kaT ke kab aae

'riyaz' dhyan ham-aghosh aaine se raha

KHayal us ke tasawwur se haT ke kab aae