musalsal yaad aati hai chamak chashm-e-ghazalan ki

musalsal yaad aatī hai chamak chashm-e-ġhazālāñ kī

akelī zaat hai aur raat hai jangal bayābāñ kī

zarā dekho havā-e-sub.h kaise khīñch laa.ī hai

akelī pankhuḌī meñ dilkashī saare gulistāñ kī

inhīñ galiyoñ meñ khulte the mulāqātoñ ke darvāze

inhīñ galiyoñ meñ chaltī haiñ havā.eñ shām-e-hijrāñ kī

koī zarre ko zarra hī samajh kar chhoḌ detā hai

kisī ko sūjhtī hai is se ta.amīr-e-bayābāñ kī

ye vo mausam hai jis meñ koī pattā bhī nahīñ hiltā

dil-e-tanhā uThātā hai sa.ūbat shām-e-hijrāñ kī

yahī kaafī hai dil se muddatoñ kā bojh to utrā

chalo is chashm-e-giryāñ ne koī mushkil to āsāñ kī

sitāre dard kī āvāz se ġhāfil nahīñ rahte

dam-e-āhū se raushan mash'aleñ reg-e-bayābāñ kī

musalsal yaad aati hai chamak chashm-e-ghazalan ki

akeli zat hai aur raat hai jangal bayaban ki

zara dekho hawa-e-subh kaise khinch lai hai

akeli pankhuDi mein dilkashi sare gulistan ki

inhin galiyon mein khulte the mulaqaton ke darwaze

inhin galiyon mein chalti hain hawaen sham-e-hijran ki

koi zarre ko zarra hi samajh kar chhoD deta hai

kisi ko sujhti hai is se tamir-e-bayaban ki

ye wo mausam hai jis mein koi patta bhi nahin hilta

dil-e-tanha uThata hai saubat sham-e-hijran ki

yahi kafi hai dil se muddaton ka bojh to utra

chalo is chashm-e-giryan ne koi mushkil to aasan ki

sitare dard ki aawaz se ghafil nahin rahte

dam-e-ahu se raushan mash'alen reg-e-bayaban ki