mushaire nazar aate hain manDiyon ki tarah

mushā'ire nazar aate haiñ manDiyoñ kī tarah

bulā.e jaate haiñ ham jin meñ ranDiyoñ kī tarah

ye ehtimām to saarā hai māl-o-shohrat kā

lagā.e jaate haiñ ash'ār jhanDiyoñ kī tarah

phir ab ke dhoke se maarā gayā pitāma-e-'ishq

dikhā ke husn badan kā shikhanDiyoñ kī tarah

libās-e-jism to hai mustaqil libās-e-'adam

vujūd ko to pahante haiñ banDiyoñ kī tarah

havas ke maare hue log mārte haiñ hameñ

mohabbatoñ ke tarāzū kī DanDiyoñ kī tarah

tumheñ lagā.eñge ik zarb-e-inkisār ki bas

kabhī jo sāmne aa.e ghamanDiyoñ kī tarah

musha'ire nazar aate hain manDiyon ki tarah

bulae jate hain hum jin mein ranDiyon ki tarah

ye ehtimam to sara hai mal-o-shohrat ka

lagae jate hain ash'ar jhanDiyon ki tarah

phir ab ke dhoke se mara gaya pitama-e-'ishq

dikha ke husn badan ka shikhanDiyon ki tarah

libas-e-jism to hai mustaqil libas-e-'adam

wujud ko to pahante hain banDiyon ki tarah

hawas ke mare hue log marte hain hamein

mohabbaton ke taraazu ki DanDiyon ki tarah

tumhein lagaenge ek zarb-e-inkisar ki bas

kabhi jo samne aae ghamanDiyon ki tarah