mushkil hai jidhar jaana udhar jaane ki zid hai

mushkil hai jidhar jaanā udhar jaane kī zid hai

rasta hai na manzil hai magar jaane kī zid hai

ye log ba-zid haiñ ki rahūñ apnī hadoñ meñ

aur mujh ko mirī had se guzar jaane kī zid hai

maiñ huuñ ki use sar pe biThāne pe musir huuñ

vo hai ki use dil se utar jaane kī zid hai

sāñseñ haiñ ki chaltī hī chalī jaatī haiñ paiham

aur dil ko isī lamha Thahar jaane kī zid hai

kyoñ 'ishq kī nagrī meñ bhaTakte ho musāfir

kis raah pe chalte ho kidhar jaane kī zid hai

but-ḳhāna ho masjid ho haram ho yā kalīsā

jaane do mujhe mujh ko agar jaane kī zid hai

ye kaun sī manzil hai 'sahar' yās-o-alam kī

ḳhvāboñ ko mire ḳhud hī bikhar jaane kī zid hai

mushkil hai jidhar jaana udhar jaane ki zid hai

rasta hai na manzil hai magar jaane ki zid hai

ye log ba-zid hain ki rahun apni hadon mein

aur mujh ko meri had se guzar jaane ki zid hai

main hun ki use sar pe biThane pe musir hun

wo hai ki use dil se utar jaane ki zid hai

sansen hain ki chalti hi chali jati hain paiham

aur dil ko isi lamha Thahar jaane ki zid hai

kyon 'ishq ki nagri mein bhaTakte ho musafir

kis rah pe chalte ho kidhar jaane ki zid hai

but-KHana ho masjid ho haram ho ya kalisa

jaane do mujhe mujh ko agar jaane ki zid hai

ye kaun si manzil hai 'sahar' yas-o-alam ki

KHwabon ko mere KHud hi bikhar jaane ki zid hai