musibat ke bhanwar mein bhi shanawar wo sanbhalta hai

musībat ke bhañvar meñ bhī shanāvar vo sañbhaltā hai

yaqīñ ho jis ko ḳhud par vo talātum se nikaltā hai

hathelī kī lakīroñ se nujūmī kī hī bātoñ se

nikammā aur kāhil to ḳhushī se bas uchhaltā hai

vafā kī raah meñ hamdam ġharībī ho ga.ī haa.il

tujhe paane kī ḳhvāhish meñ mirā to dil machaltā hai

havāoñ se na ghabrāo charāġhoñ ko jalāne do

shujā'at dekh kar apnī 'adū kā dil dahaltā hai

ga.e vo din banī-ādam kahā karte the sach har dam

zabāñ ko hazrat-e-insāñ libāsoñ sā badaltā hai

sarāboñ meñ na paanī hai haqīqat ye purānī hai

magar rahbar hamārā kyoñ nahīñ rasta badaltā hai

anā kī tum parastish ko usūloñ meñ gināte ho

ye 'parvāna' magar bas inkisārī se pighaltā hai

musibat ke bhanwar mein bhi shanawar wo sanbhalta hai

yaqin ho jis ko KHud par wo talatum se nikalta hai

hatheli ki lakiron se nujumi ki hi baaton se

nikamma aur kahil to KHushi se bas uchhalta hai

wafa ki rah mein hamdam gharibi ho gai hail

tujhe pane ki KHwahish mein mera to dil machalta hai

hawaon se na ghabrao charaghon ko jalane do

shuja'at dekh kar apni 'adu ka dil dahalta hai

gae wo din bani-adam kaha karte the sach har dam

zaban ko hazrat-e-insan libason sa badalta hai

sarabon mein na pani hai haqiqat ye purani hai

magar rahbar hamara kyon nahin rasta badalta hai

ana ki tum parastish ko usulon mein ginate ho

ye 'parwana' magar bas inkisari se pighalta hai