musibat mein bhi ghairat-ashna KHamosh rahti hai

musībat meñ bhī ġhairat-āshnā ḳhāmosh rahtī hai

ki durveshoñ kī hājat to sadā ḳhāmosh rahtī hai

ḳhushī kā jashn ho yā mātam-e-marg-e-tamannā ho

yahāñ har haal meñ ḳhalq-e-ḳhudā ḳhāmosh rahtī hai

shajar ko vajd aatā hai na to shāḳheñ lachaktī haiñ

bahāroñ meñ bhī ab bād-e-sabā ḳhāmosh rahtī hai

mirī chashm-e-talab meñ ḳhvāb kā hañgāma ḳhema-zan

magar ta.abīr misl-e-kaj-adā ḳhāmosh rahtī hai

darūn-e-ḳhāna-e-dil roz o shab mahshar bapā lekin

zabāñ apnī barā.e-tajraba ḳhāmosh rahtī hai

chamak uThte haiñ jab chehre tab-o-tāb-e-tamannā se

to phir shā.istagī-e-ā.īna ḳhāmosh rahtī hai

mire chāroñ taraf aks-e-tilism-e-sāmrī raushan

ḳhamoshī chīḳhtī hai aur sadā ḳhāmosh rahtī hai

laraz jaatī haiñ palkeñ ashk jam jaate haiñ āñkhoñ meñ

jab apnī ḳhvāhish-e-be-sāḳhta ḳhāmosh rahtī hai

daraḳhtoñ kī baġhāvat hai ki ye mausam kī be-rahmī

ki jañgal aah bhartā hai havā ḳhāmosh rahtī hai

musibat mein bhi ghairat-ashna KHamosh rahti hai

ki durweshon ki hajat to sada KHamosh rahti hai

KHushi ka jashn ho ya matam-e-marg-e-tamanna ho

yahan har haal mein KHalq-e-KHuda KHamosh rahti hai

shajar ko wajd aata hai na to shaKHen lachakti hain

bahaaron mein bhi ab baad-e-saba KHamosh rahti hai

meri chashm-e-talab mein KHwab ka hangama KHema-zan

magar tabir misl-e-kaj-ada KHamosh rahti hai

darun-e-KHana-e-dil roz o shab mahshar bapa lekin

zaban apni barae-tajraba KHamosh rahti hai

chamak uThte hain jab chehre tab-o-tab-e-tamanna se

to phir shaistagi-e-aina KHamosh rahti hai

mere chaaron taraf aks-e-tilism-e-samri raushan

KHamoshi chiKHti hai aur sada KHamosh rahti hai

laraz jati hain palken ashk jam jate hain aankhon mein

jab apni KHwahish-e-be-saKHta KHamosh rahti hai

daraKHton ki baghawat hai ki ye mausam ki be-rahmi

ki jangal aah bharta hai hawa KHamosh rahti hai