musibat mein kabhi aise hasin lamhe bhi aate hain

musībat meñ kabhī aise hasīñ lamhe bhī aate haiñ

ki dushman bhī purānī ranjishoñ ko bhuul jaate haiñ

bahut jī chāhtā hai jin se koī sach batāne ko

na jaane kyoñ vo sach qasdan unhī se ham chhupāte haiñ

unheñ ḳhud ehtisābī kī bhī kuchh taufīq ho yā-rab

jo qasdan aa.e din merī vafā.eñ āzmāte haiñ

baḌā qātil takalluf pal rahā hai tere lahje meñ

baḌe shub.hāt mere dil meñ paiham sar uThāte haiñ

ḳhudā rā sang-rezoñ kā shub.h karnā na tum hargiz

mire ḳhat meñ ḳhulūs-e-dil ke motī jagmagāte haiñ

ye ruḳh hai kyā hasīñ 'anvar-shamīm' apnī tabāhī kā

ka.ī ahbāb jo bechain the ab muskurāte haiñ

musibat mein kabhi aise hasin lamhe bhi aate hain

ki dushman bhi purani ranjishon ko bhul jate hain

bahut ji chahta hai jin se koi sach batane ko

na jaane kyon wo sach qasdan unhi se hum chhupate hain

unhen KHud ehtisabi ki bhi kuchh taufiq ho ya-rab

jo qasdan aae din meri wafaen aazmate hain

baDa qatil takalluf pal raha hai tere lahje mein

baDe shubhat mere dil mein paiham sar uThate hain

KHuda ra sang-rezon ka shubh karna na tum hargiz

mere KHat mein KHulus-e-dil ke moti jagmagate hain

ye ruKH hai kya hasin 'anwar-shamim' apni tabahi ka

kai ahbab jo bechain the ab muskuraate hain