muskuraati hui aankhen thin ki jhilmil se charagh

muskurātī huī āñkheñ thiiñ ki jhilmil se charāġh

us ke jaate hī lagā chal diye mahfil se charāġh

tīrgī ko hī mirā rāh-numā rahne de

mujh ko gumrāh na kar deñ kahīñ manzil se charāġh

shab-e-‘āshūr batā tujh ko bhī mā'lūm nahīñ

bā'is-e-nūr-e-do-'ālam haiñ ye bismil se charāġh

kis ne kholā hai mirā raaz ki maiñ huuñ sūraj

haT ga.e sharm se ḳhud mere muqābil se charāġh

tujh se pahle hī havā ne mirā ghar dekh liyā

ab darīchoñ meñ jaleñge zarā mushkil se charāġh

maiñ to ġharqāb-e-talātum huuñ baḌī muddat se

kis ko dete haiñ sadā aaj bhī sāhil se charāġh

tū ki ruḳhsār pe ḳhurshīd liye phirtā hai

raushnī māñgte rahte haiñ tire til se charāġh

maiñ to 'sāgar' kī huuñ ik mauj tū pahchān mujhe

jab bhī chāhūñgā maiñ le jā.ūñgā sāhil se charāġh

muskuraati hui aankhen thin ki jhilmil se charagh

us ke jate hi laga chal diye mahfil se charagh

tirgi ko hi mera rah-numa rahne de

mujh ko gumrah na kar den kahin manzil se charagh

shab-e-‘ashur bata tujh ko bhi ma'lum nahin

ba'is-e-nur-e-do-'alam hain ye bismil se charagh

kis ne khola hai mera raaz ki main hun suraj

haT gae sharm se KHud mere muqabil se charagh

tujh se pahle hi hawa ne mera ghar dekh liya

ab darichon mein jalenge zara mushkil se charagh

main to gharqab-e-talatum hun baDi muddat se

kis ko dete hain sada aaj bhi sahil se charagh

tu ki ruKHsar pe KHurshid liye phirta hai

raushni mangte rahte hain tere til se charagh

main to 'sagar' ki hun ek mauj tu pahchan mujhe

jab bhi chahunga main le jaunga sahil se charagh