mutmain dil unki ulfat se magar aankhen pur-ab

mutma.in dil un kī ulfat se magar āñkheñ pur-āb

aah dīvāne kī duniyā aah dīvāne kā ḳhvāb

miT chukā hotā kabhī kā ye dil-e-nā-kāmyāb

chheḌtā rahtā hai aksar koī hastī kā rabāb

jaam ban kar jhuk rahe haiñ āftab-o-māhtāb

ye luTāne aa gayā hai kaun āñkhoñ se sharāb

tak rahe haiñ Dūbte taare dhaḌakte dil ke saath

sub.h kā rangīñ samāñ hai aur vo haiñ mahv-e-ḳhvāb

allah allah ye nigāh-e-muntazir kā mo.ajiza

sau hijāboñ se huā jaatā hai koī be-hijāb

kaun maltā hai nasīm-e-sub.h meñ ye siskiyāñ

kaun aaj uTThā hai un kī bazm se nā-kāmyāb

koī tārīkī meñ chupke se baḌhā detā hai lau

jab shab-e-ġham bujhne lagtā hai dil-e-nā-kāmyāb

ai 'shifā' mere savāloñ ne sitam ye kyā kiyā

aah kin āñkhoñ se un ko dekhtā huuñ lā-javāb

mutmain dil un ki ulfat se magar aankhen pur-ab

aah diwane ki duniya aah diwane ka KHwab

miT chuka hota kabhi ka ye dil-e-na-kaamyab

chheDta rahta hai aksar koi hasti ka rabab

jam ban kar jhuk rahe hain aaftab-o-mahtab

ye luTane aa gaya hai kaun aankhon se sharab

tak rahe hain Dubte tare dhaDakte dil ke sath

subh ka rangin saman hai aur wo hain mahw-e-KHwab

allah allah ye nigah-e-muntazir ka moajiza

sau hijabon se hua jata hai koi be-hijab

kaun malta hai nasim-e-subh mein ye siskiyan

kaun aaj uTTha hai un ki bazm se na-kaamyab

koi tariki mein chupke se baDha deta hai lau

jab shab-e-gham bujhne lagta hai dil-e-na-kaamyab

ai 'shifa' mere sawalon ne sitam ye kya kiya

aah kin aankhon se un ko dekhta hun la-jawab