mutmain hun ki mujhe chhoD ke itna KHush hai

mutma.in huuñ ki mujhe chhoḌ ke itnā ḳhush hai

vo jise dekh ke lagtā hai ki bachcha ḳhush hai

kitnā ḳhush hai vo mohabbat se rihā.ī pā kar

jab se rūThā hai zarūrat se ziyāda ḳhush hai

maiñ na hotā to use niiñd nahīñ aatī thī

maiñ to hairān huuñ vo shaḳhs akelā ḳhush hai

aisī hālat hai tire hijr meñ dīvāne kī

vo tamāsha hai ki har dekhne vaalā ḳhush hai

mujh se bezār se shikva nahīñ karnā jaa.ez

mujh sā ḳhush ho bhī to lagtā hai adhūrā ḳhush hai

dostā maiñ bhī kabhī mast huā kartā thā

sab mujhe dekh ke kahte the ki laḌkā ḳhush hai

tū batā dost ki fankār ko kyā kahtā maiñ

jis ne marzī se banā ke mujhe pūchhā ḳhush hai

ye qafas khol do aur sāmne se haT jaao

baiTh jaa.e to samajh lo ki parinda ḳhush hai

mutmain hun ki mujhe chhoD ke itna KHush hai

wo jise dekh ke lagta hai ki bachcha KHush hai

kitna KHush hai wo mohabbat se rihai pa kar

jab se ruTha hai zarurat se ziyaada KHush hai

main na hota to use nind nahin aati thi

main to hairan hun wo shaKHs akela KHush hai

aisi haalat hai tere hijr mein diwane ki

wo tamasha hai ki har dekhne wala KHush hai

mujh se bezar se shikwa nahin karna jaez

mujh sa KHush ho bhi to lagta hai adhura KHush hai

dosta main bhi kabhi mast hua karta tha

sab mujhe dekh ke kahte the ki laDka KHush hai

tu bata dost ki fankar ko kya kahta main

jis ne marzi se bana ke mujhe puchha KHush hai

ye qafas khol do aur samne se haT jao

baiTh jae to samajh lo ki parinda KHush hai