muzmar hai baqa hasti-e-alam ki fana mein

muzmar hai baqā hastī-e-ālam kī fanā meñ

ik jalva-e-vahdat bhī hai kasrat kī fazā meñ

āvāz-e-alast aap kī maiñ sun to chukā thā

apne ko phañsāyā hai balā kah ke balā meñ

nairangī-e-andāz-e-nazar dekh rahā huuñ

Duubī huī hai shoḳh-nazar sharm-o-hayā meñ

dam toḌtā is tarah na bīmār-e-mohabbat

shāyad ki ajal bhī thī sharīk un kī adā meñ

dekhā hai jo vahshī kā tire ḳhaak uḌānā

chakkar meñ bagūlā hai to gardish hai havā meñ

dekho mujhe dekhā na karo nīchī nazar se

kyoñ karte ho rusvā mujhe bazm-e-rufaqā meñ

ye ḳhatm na hogī na kabhī aa.egā vo din

kyā farq shab-e-hijr meñ aur roz-e-jazā meñ

lo fasl-e-bahār aate hī vo ho gayā ifshā

jo raaz ki ġhunchoñ kā thā poshīda sabā meñ

kaun aaya thā ai shaiḳh gayā kaun idhar se

sajdoñ ke nishāñ kaise haiñ naqsh-e-kaf-e-pā meñ

pūchho ye sikandar se ki shāhī na thī kaafī

jo umr basar kī havas-e-āb-e-baqā meñ

saaqī ne jo zāhid ko zarā aañkh dikhā.ī

be-ḳhud hue ik jām-e-mai-e-hosh-rubā meñ

kyoñ ahl-e-fanā se ḳhabar-e-qāfila pūchheñ

ham jānte haiñ gum vo huā rāh-e-baqā meñ

lā-ilm huuñ kyā jāniye kyā is meñ likhā hai

hai nāma-e-a.amāl mirā dast-e-qazā meñ

Dartā huuñ kahīñ vo na jhijak jaa.e na Dar jaa.e

paidā huī bijlī kī chamak āh-e-rasā meñ

ye kam hai darāzī meñ na vo tuul meñ kuchh kam

nisbat hai shab-e-hijr meñ aur zulf-e-dotā meñ

kyoñ bāñdh nahīñ lete ho dil 'shād' kā le kar

tukme kī kamī hai jo garebān-e-qabā meñ

muzmar hai baqa hasti-e-alam ki fana mein

ek jalwa-e-wahdat bhi hai kasrat ki faza mein

aawaz-e-alast aap ki main sun to chuka tha

apne ko phansaya hai bala kah ke bala mein

nairangi-e-andaz-e-nazar dekh raha hun

Dubi hui hai shoKH-nazar sharm-o-haya mein

dam toDta is tarah na bimar-e-mohabbat

shayad ki ajal bhi thi sharik un ki ada mein

dekha hai jo wahshi ka tere KHak uDana

chakkar mein bagula hai to gardish hai hawa mein

dekho mujhe dekha na karo nichi nazar se

kyon karte ho ruswa mujhe bazm-e-rufaqa mein

ye KHatm na hogi na kabhi aaega wo din

kya farq shab-e-hijr mein aur roz-e-jaza mein

lo fasl-e-bahaar aate hi wo ho gaya ifsha

jo raaz ki ghunchon ka tha poshida saba mein

kaun aaya tha ai shaiKH gaya kaun idhar se

sajdon ke nishan kaise hain naqsh-e-kaf-e-pa mein

puchho ye sikandar se ki shahi na thi kafi

jo umr basar ki hawas-e-ab-e-baqa mein

saqi ne jo zahid ko zara aankh dikhai

be-KHud hue ek jam-e-mai-e-hosh-ruba mein

kyon ahl-e-fana se KHabar-e-qafila puchhen

hum jaante hain gum wo hua rah-e-baqa mein

la-ilm hun kya jaaniye kya is mein likha hai

hai nama-e-amal mera dast-e-qaza mein

Darta hun kahin wo na jhijak jae na Dar jae

paida hui bijli ki chamak aah-e-rasa mein

ye kam hai daraazi mein na wo tul mein kuchh kam

nisbat hai shab-e-hijr mein aur zulf-e-dota mein

kyon bandh nahin lete ho dil 'shad' ka le kar

tukme ki kami hai jo gareban-e-qaba mein