muztarib sa rahta hai mujhse baat karte waqt

muztarib sā rahtā hai mujh se baat karte vaqt

pher kar kalā.ī ko baar baar dekhe vaqt

bārhā ye sochā hai ghar se aaj chalte vaqt

hādisa na ho jaa.e raah se guzarte vaqt

koī bhī nahīñ pahuñchā aag se bachāne ko

maiñ thā aur tanhā.ī apne ghar meñ jalte vaqt

is qadar añdherā thā is qadar thā sannāTā

chāñdnī bhī Dartī thī gaañv meñ bikharte vaqt

maiñ to ḳhair nādim thā is liye bhī chup chup thā

vo bhī kuchh nahīñ bolā rāsta badalte vaqt

vo visāl do pal kā bhūltā nahīñ shāhid

maiñ ne us ko chūmā thā sīḌhiyāñ utarte vaqt

muztarib sa rahta hai mujh se baat karte waqt

pher kar kalai ko bar bar dekhe waqt

barha ye socha hai ghar se aaj chalte waqt

hadisa na ho jae rah se guzarte waqt

koi bhi nahin pahuncha aag se bachane ko

main tha aur tanhai apne ghar mein jalte waqt

is qadar andhera tha is qadar tha sannaTa

chandni bhi Darti thi ganw mein bikharte waqt

main to KHair nadim tha is liye bhi chup chup tha

wo bhi kuchh nahin bola rasta badalte waqt

wo visal do pal ka bhulta nahin shahid

main ne us ko chuma tha siDhiyan utarte waqt