na aasman ke hue aur na hum zamin ke rahe

na āsmāñ ke hue aur na ham zamīñ ke rahe

kisī se 'ishq huā phir na ham kahīñ ke rahe

vo pal na lauT ke ā.eñge zindagī meñ kabhī

jo merī haañ se ziyāda tirī nahīñ ke rahe

phir aisā rishta nibhānā sazā ke jaisā hai

kisī ke saath jo koī binā yaqīñ ke rahe

ḳhudā ko bhuul ke maanā thā pyaar ko hī ḳhudā

na ham ko pyaar hī hāsil huā na diiñ ke rahe

base haiñ shahr meñ par dil se gaañv niklā nahīñ

yahāñ pe rah ke bhī ham 'umr bhar vahīñ ke rahe

kisī ko dil meñ basā lo ki ho ga.e khanDar

vo sab makān jo aksar binā makīñ ke rahe

na aasman ke hue aur na hum zamin ke rahe

kisi se 'ishq hua phir na hum kahin ke rahe

wo pal na lauT ke aaenge zindagi mein kabhi

jo meri han se ziyaada teri nahin ke rahe

phir aisa rishta nibhana saza ke jaisa hai

kisi ke sath jo koi bina yaqin ke rahe

KHuda ko bhul ke mana tha pyar ko hi KHuda

na hum ko pyar hi hasil hua na din ke rahe

base hain shahr mein par dil se ganw nikla nahin

yahan pe rah ke bhi hum 'umr bhar wahin ke rahe

kisi ko dil mein basa lo ki ho gae khanDar

wo sab makan jo aksar bina makin ke rahe