na aati thi kahin dil mein nazar aag

na aatī thī kahīñ dil meñ nazar aag

magar phir bhī jalī hai raat bhar aag

khulā hai dil meñ ik dāġhoñ kā gulshan

ugaltā hai mirā zaḳhm-e-jigar aag

bulāyā thā mujhe bazm-e-tarab meñ

lagā dī dil meñ kyuuñ muñh pher kar aag

dikhāyā tuur par muusā ko jalva

kahāñ jā kar banī hai rāhbar aag

ye girya aur phir āh-e-sharar-bār

taraqqī par idhar paanī udhar aag

vo merā dil jalānā khel samjhe

karegī rafta rafta ye asar aag

shab-e-ġham is qadar royā hai koī

ki DhūñDe bhī nahīñ miltī sahar aag

vo dil par haath rakh kar ga.e haiñ

ki ab jalne na paa.e raat bhar aag

zamāne ko jalātā hai vo zālim

na ban jaa.eñ kahīñ shams-o-qamar aag

ye kis kī sard-mehrī kā asar thā

na dekhī tuur par bhī jalva-gar aag

karūñ kyā āh-e-sozāñ hijr kī shab

farishtoñ ke jalā detī hai par aag

ye dushman kā makān apnā hī ghar hai

lagā deñ aap be-ḳhauf-o-ḳhatar aag

dil-e-sozāñ ye kah de chashm-e-tar se

ḳhudā ke vāste ThanDī na kar aag

hasad kī aag meñ jaltā hai ab tak

barastī hai adū kī qabr par aag

vuzū ho jā.eñge zāhid ke ThanDe

bujhā degī kisī kī chashm-e-tar aag

dil-e-nādāñ ko ham samjhā chuke the

mohabbat aag hai ai be-ḳhabar aag

sunā mazmūñ javāb-e-ḳhat kā 'rāsiḳh'

uThā laayā kahīñ se nāma-bar aag

na aati thi kahin dil mein nazar aag

magar phir bhi jali hai raat bhar aag

khula hai dil mein ek daghon ka gulshan

ugalta hai mera zaKHm-e-jigar aag

bulaya tha mujhe bazm-e-tarab mein

laga di dil mein kyun munh pher kar aag

dikhaya tur par musa ko jalwa

kahan ja kar bani hai rahbar aag

ye girya aur phir aah-e-sharar-bar

taraqqi par idhar pani udhar aag

wo mera dil jalana khel samjhe

karegi rafta rafta ye asar aag

shab-e-gham is qadar roya hai koi

ki DhunDe bhi nahin milti sahar aag

wo dil par hath rakh kar gae hain

ki ab jalne na pae raat bhar aag

zamane ko jalata hai wo zalim

na ban jaen kahin shams-o-qamar aag

ye kis ki sard-mehri ka asar tha

na dekhi tur par bhi jalwa-gar aag

karun kya aah-e-sozan hijr ki shab

farishton ke jala deti hai par aag

ye dushman ka makan apna hi ghar hai

laga den aap be-KHauf-o-KHatar aag

dil-e-sozan ye kah de chashm-e-tar se

KHuda ke waste ThanDi na kar aag

hasad ki aag mein jalta hai ab tak

barasti hai adu ki qabr par aag

wuzu ho jaenge zahid ke ThanDe

bujha degi kisi ki chashm-e-tar aag

dil-e-nadan ko hum samjha chuke the

mohabbat aag hai ai be-KHabar aag

suna mazmun jawab-e-KHat ka 'rasiKH'

uTha laya kahin se nama-bar aag