na ab chaman ki KHabar hai na aashiyane ki

na ab chaman kī ḳhabar hai na āshiyāne kī

maiñ kyā karūñ ki tabī'at nahīñ Thikāne kī

bigaḌ rahī hai kuchh aisī fazā zamāne kī

chaman kī ḳhair hai yā-rab na āshiyāne kī

shab-e-firāq kī betābiyāñ ma'āz-allāh

suno bhī tum to ye bāteñ nahīñ sunāne kī

zamāna tum se zamāne kī shoḳhiyāñ tum se

tum aur ham se shikāyat karo zamāne kī

havā ne us ko bhī pahuñchā diyā kahāñ se kahāñ

bachī-khuchī jo nishānī thī āshiyāne kī

ye kyā huā ki chaman kī mizāj-dāñ bulbul

udaas baiThī hai Daalī pe āshiyāne kī

haiñ is galī meñ bhī ġhairoñ ke naqsh-e-pā 'bismil'

kahīñ jagah na rahī mere sar jhukāne kī

na ab chaman ki KHabar hai na aashiyane ki

main kya karun ki tabi'at nahin Thikane ki

bigaD rahi hai kuchh aisi faza zamane ki

chaman ki KHair hai ya-rab na aashiyane ki

shab-e-firaq ki betabiyan ma'az-allah

suno bhi tum to ye baaten nahin sunane ki

zamana tum se zamane ki shoKHiyan tum se

tum aur hum se shikayat karo zamane ki

hawa ne us ko bhi pahuncha diya kahan se kahan

bachi-khuchi jo nishani thi aashiyane ki

ye kya hua ki chaman ki mizaj-dan bulbul

udas baiThi hai Dali pe aashiyane ki

hain is gali mein bhi ghairon ke naqsh-e-pa 'bismil'

kahin jagah na rahi mere sar jhukane ki